ەلەنا رىباكينا قازاقستان كومانداسىنا جولداما الىپ بەردى

شوتلانديانىڭ گلازگو قالاسىندا تەننيستەن كوماندالىق الەم چەمپيوناتى – بيللي دجين كينگ كۋبوگىنىڭ فينالدىق كەزەڭىندە «س» توبىندا قازاقستان قۇراماسى ۇلىبريتانيانىڭ كومانداسىن ۇتىپ، شيرەك فينالعا شىقتى.

كەزدەسۋدىڭ ەكىنشى ويىنىندا قازاقستاننىڭ ءبىرىنشى، الەمنىڭ 22-راكەتكاسى ەلەنا رىباكينا مەن دۇنيەجۇزىلىك رەيتينگتە 98-ساتىدا تۇرعان حەرريەت دارت كەزدەستى.

وندا رىباكينا ءبىرىنشى پارتيادا ەسەپ 1:1 بولعاندا قاتارىنان بەس گەيمدى ۇتتى. ەسەپ –  6:1.

ەكىنشى سەتتى وتانداسىمىز 2:0 ەسەبىمەن ءساتتى باستاعانىمەن، دارت تارازى باسىن تەڭەستىردى. ەسەپ 4:4 بولعان كەزدە رىباكينا مۇمكىندىكتى جىبەرمەي، 6:4 ەسەبىمەن جەڭدى.

وسىلايشا، قازاقستان قۇراماسى 2:0 ەسەبىمەن العا شىعىپ، ¼ فينالعا جولداما الدى. ەندى قالعان جۇپتىق باسەكە ەشتەڭەنى شەشپەيدى.

بۇگىن «س» توبىندا قازاقستان كومانداسى يسپانيامەن كەزدەسەدى. ونى جەڭسە، جارتىلاي فينالعا شىعادى.

داستان كەنجالين،

استانا