Elena Rybakına Qazaqstan komandasyna joldama alyp berdi

Shotlandııanyń Glazgo qalasynda tennısten komandalyq álem chempıonaty – Bıllı Djın Kıng kýbogynyń fınaldyq kezeńinde «S» tobynda Qazaqstan quramasy Ulybrıtanııanyń komandasyn utyp, shırek fınalǵa shyqty.

Kezdesýdiń ekinshi oıynynda Qazaqstannyń birinshi, álemniń 22-raketkasy Elena Rybakına men dúnıejúzilik reıtıngte 98-satyda turǵan Herrıet Dart kezdesti.

Onda Rybakına birinshi partııada esep 1:1 bolǵanda qatarynan bes geımdi utty. Esep –  6:1.

Ekinshi setti otandasymyz 2:0 esebimen sátti bastaǵanymen, Dart tarazy basyn teńestirdi. Esep 4:4 bolǵan kezde Rybakına múmkindikti jibermeı, 6:4 esebimen jeńdi.

Osylaısha, Qazaqstan quramasy 2:0 esebimen alǵa shyǵyp, ¼ fınalǵa joldama aldy. Endi qalǵan juptyq báseke eshteńeni sheshpeıdi.

Búgin «S» tobynda Qazaqstan komandasy Ispanııamen kezdesedi. Ony jeńse, jartylaı fınalǵa shyǵady.

Dastan KENJALIN,

ASTANA