باۋىرجان يسلامحان دوپينگ داۋىنان كەيىن قازاقستان قۇراماسىنا شاقىرتۋ الدى

باۋىرجان يسلامحان قازاقستان ۇلتتىق قۇراماسىنىڭ قاراشا ايىندا وزبەكستان جانە بىرىككەن اراب امىرلىكتەرىمەن وتكىزەتىن جولداستىق ماتچتارىنا شاقىرتۋ الدى. بۇل تۋرالى قازاقستان فۋتبول فەدەراتسياسى حابارلادى.

«فۋتبولشىنىڭ ەكى جىلدىق ديسكۆاليفيكاتسياسى اياقتالىپ، كاسىپقوي كوماندامەن جاتتىعۋدى جالعاستىرۋعا بولاتىنى تۋرالى ءتيىستى قۇجاتتار الىندى»، – دەلىنگەن حابارلامادا.

قازاقستان قۇراماسىنىڭ جاتتىقتىرۋشىلار شتابى ءبىر اي بويى باۋىرجان يسلامحانمەن جاتتىقتىرۋ جۇمىسىن جۇرگىزىپ، كومانداعا شاقىرۋ تۋرالى شەشىم قابىلدادى.

«باۋىرجان تۋرالى كوپ ەستىگەنمىن. ونىڭ ۇلكەن تالانتى مەن مول تاجىريبەسى بار. الداعى وقۋ-جاتتىعۋ جيىنىندا ونىڭ دايىندىعىن قارايمىز. ويتكەنى، ەكى جىلداي يسلامحاننىڭ ويىن تاجىريبەسى بولمادى. وقۋ-جاتتىعۋ جيىنىندا ونىڭ بابىنىڭ قانداي ەكەنىن كورىپ، الداعى ويىندارعا قانشالىقتى دايىن ەكەنىن بىلەتىن بولامىز»، –  دەدى قازاقستان قۇراماسىنىڭ باس جاتتىقتىرۋشىسى ماگومەد اديەۆ.

باۋىرجان يسلامحان العاش رەت قازاقستان قۇراماسىنىڭ ساپىندا 2012 جىلعى 29 اقپان كۇنى لاتۆياعا قارسى جولداستىق ماتچتا الاڭعا شىقتى. ۇلتتىق قۇرامانىڭ قاتارىندا 46 ويىن وتكىزىپ، ءۇش گولدىڭ اۆتورى اتاندى.

سوڭعى رەت ول قازاقستان قۇراماسىندا 2020 جىلدىڭ قىركۇيەك ايىندا بەلارۋس كومانداسىنا قارسى وينادى.

داستان كەنجالين،

استانا