Ronaldý «Manchester ıýnaıtedtiń» opasyzdyq jasaǵanyn aıtty

Portýgalııalyq fýtbolshy Krıshtıaný Ronaldý brıtandyq jýrnalıst Pırs Morganǵa rezonansty suhbat berdi.

Ol suhbatta «Manchester ıýnaıted» klýbynyń sońǵy 13 jylda jaqsy jaqqa ózgermegenin aıtty.

«Sońǵy 13 jylda komanda jaqsy jaqqa esh ózgergen joq. О́sý nólge teń. Ser Aleks Fergıýsson qyzmetten ketkennen keıin klýbta eshqandaı ózgeris kórmedim», — dedi ol.

Sonymen birge fýtbolshy klýbty ózine opasyzdyq jasady dep aıyptap, satqyndyqty sezingenin jetkizdi.

«Men «Manchester Iýnaıtedtiń» opasyzdyq jasaǵanyn sezinip júrmin. «Manchester Iýnaıtedtiń» basshylyǵy meni klýbtan ketýge májbúr etti. Muny bas jattyqtyrýshy ǵana emes, klýbtaǵy basqa adamdar da qalaǵan. Men opasyzdyq pen satqyndyqty sezindim. Bul suhbatty ne úshin berip otyrmyn? Adamdar bar shyndyqty bilýi kerek. Komandadaǵy keıbir adamdar meni bıyl ǵana emes, ótken maýsymda da «Manchester ıýnaıtedte» kórgisi kelmedi», — dedi Ronaldý.

Ol klýbtyń qazirgi bas jattyqtyrýshysy Erık Ten Hagty syılamaıtynyn da aıtty.

«Ten Hag meni syılamaıdy. Meni syılamaıtyn adamdy men de syılaı almaımyn», — dedi ol.

«Manchester ıýnaıtedtiń» basshylyǵy Ronaldýdyń suhbatynan keıin málimdeme jasaıtynyn, fýtbolshyǵa 1,14 mln eýro aıyppul salatynyn habarlady.

Ronaldýdyń klýbpen kelisimsharty 2023 jyldyń maýsym aıynda deıin jasalǵan.

Qazan aıynda Ronaldý «Tottenhem» klýbyna qarsy oıynda (2:0) qosalqy quramǵa túsýden bas tartyp, stadıonnan ketip qalǵan edi. Komandanyń bas jattyqtyrýshysy Erık Ten Hag fýtbolshynyń osy áreketi úshin jattyǵýdan ýaqytsha shettetti.

Dastan KENJALIN,

ASTANA