تۇركىستاندا قازاق كۇرەسىنەن ازيا كۋبوگى باستالدى

تۇركىستاندا قازاق كۇرەسىنەن ەرەسەكتەر اراسىندا قاجىمۇقان مۇڭايتپاس ۇلىنىڭ جۇلدەسىنە ارنالعان ازيا كۋبوگى ءۇشىن حالىقارالىق ءتۋرنيرى باستالدى. ءداستۇرلى جارىستا تاجىكستان، وزبەكستان، قىرعىزستان، قىتاي مەملەكەتتەرى مەن ەلىمىزدىڭ بارلىق وڭىرلەرىنەن كەلگەن 300-گە جۋىق سپورتشى كۇش سىناسادى.

ازيا كۋبوگىندا سايدىڭ تاسىنداي ىرىكتەلەگەن بىلەكتى دە جۇرەكتى بالۋاندارعا تۇركىستان وبلىسى اكىمىنىڭ ورىنباسارى ارمان سابيتوۆ ساتتىلىك تىلەپ، وبلىس اكىمى دارحان ساتىبالدىنىڭ قۇتتىقتاۋ حاتىن وقىپ بەردى.

قازاق كۇرەسى – ۇلتتىق سپورت تۇرلەرىنىڭ ىشىندە وزىندىك ورنى بار ەرەكشە سپورتتىڭ ءتۇرى. قازىرگى ۋاقىتتا الەمنىڭ 40-تان اسا ەلىندە ۇلتتىق كۇرەسىمىزدەن فەدەراتسيالار قۇرىلىپ، جۇمىس اتقارۋدا. قازاق كۇرەسىنەن الەم، ازيا، افريكا جانە ەۋروپا چەمپيوناتتارى وتكىزىلىپ، دامۋدىڭ جاڭا دەڭگەيىنە كوتەرىلدى. كەيىنگى ون جىل كولەمىندە ءوتىپ جاتقان «قازاقستان بارىسى»، «ەۋرازيا بارىسى» جانە  «الەم بارىسى» دودالارى دا بۇگىندە كورەرمەن كوزايىمىنا اينالىپ وتىر. ءبىز ۇلتتىق سپورتىمىزعا قولداۋ كورسەتۋگە ارقاشان دايىنبىز! – دەلىنگەن قۇتتىقتاۋ حاتىندا.

ەكى كۇن بويى جالعاساتىن بالۋاندار بەلدەسۋىندە 55، 60، 66، 74، 82، 90، 100، +100 كەلى سالماق دارەجەسىندەگى ۇزدىكتەر انىقتالاتىن بولادى. جارىستىڭ باس تورەشىسى ەرلان يمانعاليەۆتىڭ ايتۋىنشا، جەڭىمپازدارعا قارجىلاي سىي-سيپات ۇسىنىلىپ، تۇيە بالۋانعا اۆتوكولىكتىڭ كىلتى تابىس ەتىلەدى.

جۋىردا تۇركىستان قالاسىندا قازاق كۇرەسىنەن «تۇران بارىسى» ازيا كۋبوگى ۇيىمداستىرىلىپ، جارىستىڭ ناتيجەسىندە قازاقستان قۇراما كومانداسى جەڭىمپاز اتانعان بولاتىن. جالپى تۇركىستان  وبلىسىندا 4 وبلىستىق، 28 اۋداندىق جانە قالالىق بالالار مەن جاسوسپىرىمدەر سپورت مەكتەبىندە قازاق كۇرەسى بولىمدەرى بار. وندا 148 جاتتىقتىرۋشى 3600-دەن اسا بالاعا وقۋ-جاتتىعۋ جۇمىستارىن جۇرگىزەدى.

عابيت ساپاربەك،

تۇركىستان

فوتو: تۇركىستان وبلىسى اكىمىنىڭ ءباسپاسوز قىزمەتى