يراندا ەرەۋىلشىلەر ءوز فۋتبولشىلارىنىڭ جەڭىلىپ قالعانىن تويلادى

يران حالقى فۋتبولدان ۇلتتىق قۇراما كوماندانىڭ الەم چەمپيوناتىندا جەڭىلىپ قالعانىن تويلادى، دەپ حابارلادى ازاتتىق راديوسىنىڭ يرانداعى قىزمەتى.

B توبىندا ويناعان يران قۇراماسى اقش-تان جەڭىلىپ، پلەي-وفقا وتە الماي قالعان ەدى. سول سەبەپتى، جۇرت ەل استاناسى تەگەران مەن وزگە دە بىرنەشە قالادا كوشەدە بيلەپ، كولىك سيگنالىن باسىپ، شاتتانعان.

حالىق بيلىككە قارسىلىعىن وسىلايشا ءبىلدىرىپ وتىر. ويتكەنى ولار كاتارداعى الەم چەمپيوناتى باستالعاندا «يسلاميست رەسپۋبليكانىڭ اتىنان قاتىسىپ جاتقان» ءوز ەلىنىڭ قۇراماسىن قولداۋدان باس تارتقان بولاتىن.

اقپاراتقا سەنسەك، يراننىڭ سولتۇستىگىندە پوليتسيا كوشەگە جەڭىلىستى «تويلاپ» شىققان ءبىر ادامدى اتىپ تاستاعان.

نەگىزىندە قازىرگى بيلىگىنە وسى «تويلاۋعا» نەگىز بولعان فۋتبولشىلاردىڭ وزدەرى دە قارسى. ولار بيلىكتىڭ نارازىلىقتى باسىپ-جانشىپ جاتقانىنا وراي، انگلياعا قارسى ماتچتا ءانۇراندارىن شىرقاماي قويعان بولاتىن. بىراق ءانۇراندى ۋەلس پەن اقش-قا قارسى وتكەن ماتچا ايتۋعا تۋرا كەلگەن. CNN-ءنىڭ حابارلاۋىنشا، ولاردى «ءانۇراندى ايتاسىڭدار» دەپ يسلام رەۆوليۋتسياسى قامقورشىلار كورپۋسىنىڭ مۇشەلەرى قورقىتقان كورىنەدى.

ءبىر قىزىعى، يران سوتى 29 قاراشادا ۋەلستى جەڭگەن فۋتبول قۇراماسىنىڭ قۇرمەتىنە تۇرمەدەن 715 ادامدى بوساتقان. ولاردىڭ اراسىندا جاپپاي نارازىلىق كەزىندە ۇستالعاندار دا بار.

ەركەعالي بەيسەنوۆ،

استانا