ايدوس ەربوسىن ۇلى اۋىر نوكاۋتتان كەيىن ەلگە ورالدى

كاسىپقوي بوكسشى ايدوس ەربوسىن ۇلى ەلگە ورالدى.

قاراشا ايىنىڭ العاشقى اپتاسىندا بوكسشى كۋبالىق داۆيد موررەلمەن كەزدەسۋدە 12-راۋندتا نوكاۋتقا ءتۇسىپ، العاش رەت جەڭىلىس تاپقان ەدى. سودان كەيىن ول اۋىر سوققىدان ەسىن جيا الماي، اۋرۋحاناعا جاتقىزىلدى. بوكسشى اقش-تا ءبىر اي اۋرۋحانادا كوماعا ءتۇسىپ، ودان كەيىن ەسىن جيىپ، ەم الدى.

بۇعان دەيىن ايدوس ەربوسىن ۇلى وتانداستارىمىزعا Instagram-دا ۆيدەوۇندەۋ جولداعان بولاتىن.

ماعان جانكۇيەر بولعان جانداردىڭ بارىنە اللا رازى بولسىن! امان-ساۋمىز، اۋرۋحانادان ەمدەلىپ شىقتىق. اينالىسىپ جۇرگەن كاسىبىمىز – بوكس. ول ناعىز ەرلەردىڭ سپورتى بولعاندىقتان، مۇنداي جاعدايلار بولىپ تۇرادى. ءبىز عانا ەمەس، ايگىلى پاكياولاردىڭ ءوزى اۋرۋحاناعا تالاي رەت ءتۇسىپ، رينگكە مىقتى بولىپ ورالعان. ءبىز دە، ينشاللا، مىقتى بولىپ ورالامىز. اللا بۇيىرسا، ءالى تالاي جەڭىستەرگە جەتەمىز، چەمپيوندىق بەلدىكتى الىپ كەلەمىز، — دەگەن ەدى ول.

داستان كەنجالين،

استانا