رونالدۋ «رەالدىڭ» بازاسىندا جاتتىعىپ ءجۇر

پورتۋگال فۋتبولشىسى كريشتيانۋ رونالدۋدىڭ ءمادريدتىڭ «رەال» كلۋبىنىڭ بازاسىندا جاتتىعىپ جۇرگەنى بەلگىلى بولدى. بۇل تۋرالى «چەمپيونات.رۋ» حابارلادى.

كاتاردا ءوتىپ جاتقان فۋتبولدان الەم چەمپيوناتىنىڭ شيرەك فينالىندا جارىس جولىنان شىعىپ قالعان پورتۋگاليا قۇراماسىمەن بىرگە ەلگە قايتقان كريشتيانۋ رونالدۋ ۋاقىتتى بوسقا وتكىزبەي، بۇرىنعى كلۋبىندا جاتتىعا باستادى.

ول «كورول كلۋبىنىڭ» ساپىندا 2009-2018 جىلدارى ونەر كورسەتكەن بولاتىن. قازىر ونىڭ كلۋبى جوق، – دەلىنگەن حابارلامادا.

پورتالدىڭ حابارلاۋىنشا، پورتۋگال ويىنشىسى يسپان كلۋبى الاڭدارىنىڭ بىرىندە ءوزىنىڭ سپورتتىق بابىن ساقتاپ قالۋ ءۇشىن جاتتىعىپ جاتىر ەكەن. ال «كورول كلۋبىنىڭ» نەگىزگى قۇرامى باسقا بازادا جاتتىعىپ جۇرگەنگە ۇقسايدى.

بۇدان بۇرىن رونالدۋ بريتانيالىق جۋرناليست پريس مورگانعا بەرگەن سۇحباتىندا «مانچەستەر يۋنايتەدتىڭ» باس جاتتىقتىرۋشىسى ەريك تەن حاگتىڭ ناشار جاعىن، كومانداداعى احۋالدىڭ ولقى تۇستارىن ايتامىن دەپ ۇلكەن داۋ-جانجالعا ۇرىنعان ەدى. شاماسى، ونىڭ اششى سىن-ەسكەرتپەسى كلۋب باسشىلىعىنىڭ شىمبايىنا قاتتى ءتيىپ كەتسە كەرەك. وسىدان كەيىن كوماندا قوجايىندارى ونىمەن كەلىسىمشارتتىڭ بۇزىلعانىن جاريالادى.

داستان كەنجالين،

استانا