پاريج وليمپياداسىنىڭ بيلەتتەرى ساتىلا باستادى

فرانتسيانىڭ استاناسى پاريج قالاسىندا وتەتىن ءحححىىى جازعى وليمپيادا ويىندارىنىڭ بيلەتتەرىنىڭ ساتىلىمى باستالدى. بۇل تۋرالى مادەنيەت جانە سپورت كوميتەتى سپورت جانە دەنە شىنىقتىرۋ ىستەرى كوميتەتىنىڭ «سپورتتى دامىتۋ ديرەكتسياسى» رەسپۋبليكالىق مەملەكەتتىك قازىنالىق كاسىپورنى حابارلادى.

جانكۇيەرلەر ساتىلىمنىڭ العاشقى كەزەڭىندە مىناداي جولمەن دە بيلەتتى ساتىپ الا الادى. ياعني، الدىمەن Make Your Games («ءوز ويىندارىڭدى جيناقتا») اتتى بيلەت پاكەتىن ساتىپ الۋ ءۇشىن 2023 جىلعى 31 قاڭتارعا دەيىن https://tickets.paris2024.org سايتىندا تىركەۋدەن ءوتۋ كەرەك. وسى جەردە 31 قاڭتاردان كەيىن تولىق ءتىزىم جاساقتالادى. ەگەر ءسىزدىڭ ءوتىنىشىڭىز لوتەرەيادا تاڭدالسا، Make Your Games بيلەت پاكەتىن ساتىپ الاسىز. سودان كەيىن 13 اقپاندا تىركەلگەن جانكۇيەرلەر اراسىندا جەرەبە بولادى. بۇل جايلى حابارلاما ءار ادامنىڭ تىركەۋ كەزىندە كورسەتىلگەن ەلەكتروندى پوشتاسىنا كەلەدى. ەسكەرە كەتەتىن ءبىر نارسە، حابارلاما العان ازاماتتار 48 ساعاتتىڭ ىشىندە ەلەكتروندى پوشتاعا كەلگەن سىلتەمەنى اشىپ، حاتتى العانىن راستاۋى كەرەك. سوسىن بيلەتتى تاڭداپ،15 اقپاننان 15 ناۋرىزعا دەيىن ساتىپ الۋىڭىزعا بولادى. جالپى، Make Your Games پاكەتىنە جەكەلەگەن 3 سايىستىڭ بيلەتى كىرەدى.

ال بيلەتتى جەكە-جەكە ساتىپ العىسى كەلەتىن جانكۇيەرلەر ءۇشىن تاعى مىناداي مۇمكىندىك بەرىلەدى. ياعني، 2023 جىلعى 1 ناۋرىز بەن ءساۋىردىڭ اياعىنا دەيىن https://tickets.paris2024.org سايتىندا تىركەۋدەن ءوتۋ كەرەك. سودان كەيىن مامىردىڭ باسىنان باستاپ بيلەت الا الاسىز.

Make Your Games بيلەت پاكەتى 72 ەۋرو، ال جەكەلەگەن بيلەت باعاسى 24 ەۋرو. تولىق اقپارات https://tickets.paris2024.org  سايتىندا جاريالانعان.

پاريج وليمپياداسىنىڭ ۇرانى Games Wide Open («بارىنشا اشىق ويىندار»). ۇيىمداستىرۋشىلار وسى ارقىلى جانكۇيەرلەردى كوپتەپ تارتۋدى ماقسات ەتىپ وتىر. سول سەبەپتى «ءوز ويىندارىڭدى جيناقتا» بيلەت پاكەتى وليمپيا ويىندارى تاريحىندا العاش رەت ۇسىنىلعان.

انىقتاما:

حالىقارالىق وليمپيادا كوميتەتى باس-اياعى 10 ميلليونداي بيلەتتى ساتىلىمعا شىعارادى. ونىڭ 1 ميلليونى 24 ەۋرودان، جارتىسى 50 ەۋرو جانە ودان ارزان باعادا قولجەتىمدى بولادى. تاعى 3 ميلليون بيلەتتىڭ باعاسى 100 ەۋرودان باستالادى. تەك بيلەتتىڭ 15 پايىزى قىمباتقا ساتىلادى.

داستان كەنجالين،

استانا