SportPress.kz قازاقستان سپورت جاڭالىقتارى
استانادا بوكستان تالاي چەمپيونداردى جاتتىقتىرعان باپكەر مامان جيەشەۆ قارتايعاندا جالعىز قالعان. 80-نەن اسقان قاريا زەينەتاقىسىن كىم الىپ جۇرگەنىن دە بىلمەيدى. بۇل تۋرالى ەۋرازيا تەلەارناسى حابارلادى.
كورشىلەرىنىڭ ايتۋىنشا، ەكى قىزىن تۇرمىسقا بەرگەن قاريانىڭ ەشكىم قارايلاسپاعاننان كۇيى كەتكەن. اقىل-ەسى دە كارىلىكتەن نەمەسە كەزىندە العان سوققىلارى سالدارىنان كىرەسىلى-شىعاسىلى. سوندىقتان تاماق ىستەمەك بولىپ، بىرنەشە رەت ءۇيىن ورتەپ الا جازداعان. جالعىز قالعان قاريا كەيدە جۋىنۋ ءۇشىن سپورت زالىنىڭ مونشاسىنا بارادى ەكەن.
ۇلدارىن وسى باپكەرگە بەرگەن اتا-انالار ونىڭ جوعارى كاسىبي مامان ەكەنىن ايتادى.
«وسىعان دەيىن ەكى ۇلىمدى وسى جاتتىقتىرۋشىعا بەردىك. سونىڭ ارقاسىندا ولار جاقسى ناتيجە كورسەتىپ ءجۇر. قازىر ۇلكەن دەڭگەيدە وليمپيادالاردىڭ قوسىمشا رەزەرۆ كومانداسىنا شىقتى»، — دەيدى ەلوردا تۇرعىنى ماۋلەن ءالىمجانوۆ.
قىزى ساۋلە تولەباەۆانىڭ ايتۋىنشا، اكەلەرى جاستايىنان جالعىزدىقتى جاقسى كورگەن. انالارىمەن اجىراسقاننان كەيىن دە باۋىرلارىنا، بالالارىنا قاراماستان جالعىز تۇرۋدى شەشكەن ەكەن. ءتىپتى قارتتار ۇيىنە دە بارعىسى جوق. سونداي-اق ونىڭ زەينەتاقىسىن كارتاسىنان شەشىپ الىپ، باراتىن جەرىنە اداسپاي جەتەتىنىن العا تارتتى.
«وتكەن اپتانىڭ جەكسەنبىسىندە اعام ەكەۋمىز بارىپ، ءۇيىن جيناپ، ەدەنىن جۋىپ، 5 قاپ قوقىسىن شىعارىپ كەتتىك. ايتسام سەنبەيتىن شىعارسىز، كەلەسى كۇنى اعام تاعى بارىپ قاراسا، ءۇي كەشە جينالعانعا ۇقسامايتىن دەڭگەيدە قايتا شاشىلعان»، — دەيدى قىزى.
قارتتار ءۇيىنىڭ ماماندارى ەگەر قاريانىڭ ورتالىققا كەلگىسى كەلمەسە، ونىڭ ۇيىنە ارنايى قىزمەتكەرلەر اپتاسىنا ءبىر بارىپ، شارۋالارىنا كومەكتەسە الاتىنىن ايتادى. تەك ول ءۇشىن قۇجاتتارىن جيناپ، ارىز جازۋى كەرەك ەكەن.
«مەديتسينالىق كارتاعا تەكسەرىستەن ءوتىپ، جازىپ، حالىققا قىزمەت كورسەتۋ ورتالىعىنا بارۋى كەرەك. ورتالىق قابىلداسا، ءبىز بارىپ تۇرامىز»، — دەيدى قارتتار ءۇيىنىڭ الەۋمەتتىك قىزمەتكەرى ايگۇل بەكەەۆا.
ەركەعالي بەيسەنوۆ،
استانا
