Qarttar úıine barmaıdy: Astanada bokstan chempıondardy jattyqtyrǵan bapker jalǵyz qalǵan

Astanada bokstan talaı chempıondardy jattyqtyrǵan bapker Maman Jıeshev qartaıǵanda jalǵyz qalǵan. 80-nen asqan qarııa zeınetaqysyn kim alyp júrgenin de bilmeıdi. Bul týraly Eýrazııa telearnasy habarlady.

Kórshileriniń aıtýynsha, eki qyzyn turmysqa bergen qarııanyń eshkim qaraılaspaǵannan kúıi ketken. Aqyl-esi de kárilikten nemese kezinde alǵan soqqylary saldarynan kiresili-shyǵasyly. Sondyqtan tamaq istemek bolyp, birneshe ret úıin órtep ala jazdaǵan. Jalǵyz qalǵan qarııa keıde jýyný úshin sport zalynyń monshasyna barady eken.

Uldaryn osy bapkerge bergen ata-analar onyń joǵary kásibı maman ekenin aıtady.

«Osyǵan deıin eki ulymdy osy jattyqtyrýshyǵa berdik. Sonyń arqasynda olar jaqsy nátıje kórsetip júr. Qazir úlken deńgeıde olımpıadalardyń qosymsha rezerv komandasyna shyqty», — deıdi elorda turǵyny Máýlen Álimjanov.

Qyzy Sáýle Tólebaevanyń aıtýynsha, ákeleri jastaıynan jalǵyzdyqty jaqsy kórgen. Analarymen ajyrasqannan keıin de baýyrlaryna, balalaryna qaramastan jalǵyz turýdy sheshken eken. Tipti qarttar úıine de barǵysy joq. Sondaı-aq onyń zeınetaqysyn kartasynan sheship alyp, baratyn jerine adaspaı jetetinin alǵa tartty.

«О́tken aptanyń jeksenbisinde aǵam ekeýmiz baryp, úıin jınap, edenin jýyp, 5 qap qoqysyn shyǵaryp kettik. Aıtsam senbeıtin shyǵarsyz, kelesi kúni aǵam taǵy baryp qarasa, úı keshe jınalǵanǵa uqsamaıtyn deńgeıde qaıta shashylǵan», — deıdi qyzy.

Qarttar úıiniń mamandary eger qarııanyń ortalyqqa kelgisi kelmese, onyń úıine arnaıy qyzmetkerler aptasyna bir baryp, sharýalaryna kómektese alatynyn aıtady. Tek ol úshin qujattaryn jınap, aryz jazýy kerek eken.

«Medıınalyq kartaǵa tekseristen ótip, jazyp, Halyqqa qyzmet kórsetý ortalyǵyna barýy kerek. Ortalyq qabyldasa, biz baryp turamyz», — deıdi qarttar úıiniń áleýmettik qyzmetkeri Aıgúl Bekeeva.

Erkeǵalı BEISENOV,

ASTANA