توقاەۆ شاحماتشى دينارا سادۋاقاسوۆانى قۇتتىقتادى

پرەزيدەنت قاسىم-جومارت توقاەۆ الماتىدا ءوتىپ جاتقان شاحماتتان الەم چەمپيوناتىندا راپيد بويىنشا كۇمىس مەدال يەلەنگەن دينارا سادۋاقاسوۆانى قۇتتىقتادى، دەپ حابارلادى اقوردا.

مەملەكەت باسشىسى قازاقستان شاحماتشىلارىنىڭ الەم چەمپيوناتىنداعى جەتىستىكتەرى ەلىمىز ءۇشىن ۇلكەن ماقتانىش ەكەنىن اتاپ ءوتتى. ونىڭ ايتۋىنشا، سپورتشىلارىمىزدىڭ حالىقارالىق تۋرنيرلەردەگى ءاربىر جەڭىسى وسى سپورت تۇرىمەن اينالىساتىن جاستاردى قاناتتاندىرادى جانە بۇل قازاقستان شاحمات مەكتەبىنىڭ دەڭگەيى جوعارى ەكەنىن كورسەتەدى.

پرەزيدەنت دارىندى شاحماتشىعا تالماي ەڭبەك ەتىپ، جەڭىستەن جەڭىسكە جەتە بەرۋىنە تىلەكتەستىك ءبىلدىردى، — دەلىنگەن اقپاراتتا.

سونىمەن قاتار مەملەكەت باسشىسى الماتىدا ءوتىپ جاتقان وسى الەمدىك سايىستا جوعارى ناتيجە كورسەتكەن جانسايا ابدىمالىككە دە ىزگى تىلەگىن جولدادى.

جىلدام شاحمات بويىنشا جانسايا ابدىمالىك 5-ورىنعا، الۋا نۇرمانوۆا – 23، ءامينا قايىربەكوۆا – 26، ءبيبىسارا اساۋباەۆا 29-ورىندى مىسە تۇتتى. سونداي-اق زەينەپ سۇلتانبەك 31-ورىنعا، زارينا نۇرعايەۆا 35-ورىنعا تۇراقتادى.

الەم چەمپيوناتىنا قاتىسۋشى شاحماتشىلار 29-30 جەلتوقساندا بليتستەن سايىسقا تۇسەدى.