Toqaev shahmatshy Dınara Sádýaqasovany quttyqtady

Prezıdent Qasym-Jomart Toqaev Almatyda ótip jatqan shahmattan álem chempıonatynda rapıd boıynsha kúmis medal ıelengen Dınara Sádýaqasovany quttyqtady, dep habarlady Aqorda.

Memleket basshysy Qazaqstan shahmatshylarynyń álem chempıonatyndaǵy jetistikteri elimiz úshin úlken maqtanysh ekenin atap ótti. Onyń aıtýynsha, sportshylarymyzdyń halyqaralyq týrnırlerdegi árbir jeńisi osy sport túrimen aınalysatyn jastardy qanattandyrady jáne bul Qazaqstan shahmat mektebiniń deńgeıi joǵary ekenin kórsetedi.

Prezıdent daryndy shahmatshyǵa talmaı eńbek etip, jeńisten jeńiske jete berýine tilektestik bildirdi, — delingen aqparatta.

Sonymen qatar memleket basshysy Almatyda ótip jatqan osy álemdik saıysta joǵary nátıje kórsetken Jansaıa Ábdimálikke de izgi tilegin joldady.

Jyldam shahmat boıynsha Jansaıa Ábdimálik 5-orynǵa, Alýa Nurmanova – 23, Ámına Qaıyrbekova – 26, Bıbisara Asaýbaeva 29-oryndy mise tutty. Sondaı-aq Zeınep Sultanbek 31-orynǵa, Zarına Nurǵaıeva 35-orynǵa turaqtady.

Álem chempıonatyna qatysýshy shahmatshylar 29-30 jeltoqsanda blıten saıysqa túsedi.