ايا نۇپباي مەن اسىلجان ارىستانبەكوۆا دەليدەگى جارىستىڭ جەڭىمپازى اتاندى

تەننيسشىلەر ايا نۇپباي مەن اسىلجان ارىستانبەكوۆا ءۇندىستاننىڭ استاناسى دەلي قالاسىندا وتكەن ەكىنشى ساناتتاعى J200 DELHI جارىسىنىڭ جەڭىمپازى اتاندى.

قازاقستان تەننيس فەدەراتسياسىنىڭ حابارلاۋىنشا، نۇپباي مەن ارىستانبەكوۆا 18 جاسقا دەيىنگى اراسىندا ەلىمىزدەگى ەڭ تابىستى جۇپ بولىپ سانالادى.

ولار فينالدا تايلىق دۋەتتى 6:3، 6:2 ەسەبىمەن جەڭدى.

وتكەن جىلى وسى جۇپ ITF Juniors سەرياسىندا جەتى تۋرنيردە ۇزدىك شىققان بولاتىن. ولار وسىمەن 10 تيتۋلدى جەڭىپ الدى.

«جىل باسىندا جەڭىسكە جەتكەن ماڭىزدى. قازىرگى دەڭگەيىمە ريزامىن. بۇدان كەيىن دە بابىمدا بولامىن دەپ ويلايمىن. اسىلجانعا راحمەت، دودادا قيىن ماتچتار بولدى. ءبىز سودان ساتىمەن شىعا بىلدىك»، دەدى ا.نۇپباي.

اسىلجان ارىستانبەكوۆا دا سپورتتاعى ارىپتەسىنە قولداۋ كورمسەتكەنى ءۇشىن ريزاشىلىعىن ءبىلدىردى.

«بۇل — ايا ەكەۋمىزدىڭ ونىنشى تيتۋلىمىز. جاڭا ماۋسىم باسىنداعى تابىس تىڭ جەتىستىكتەرگە جەتەلەيدى، كۇش بەرەدى. فەدەراتسيا مەن Team Kazakhstan اكادەمياسىنىڭ بارلىق باپكەرلەرىنە العىس ايتامىز»، — دەدى ا.ارىستانبەكوۆا.

داستان كەنجالين،

استانا