قازاق كۇرەسى: تورەشىلەر تۋرالىقتان تايمايدى

بەلارۋس ەلىنىڭ باس قالاسى مينسكىدە قازاق كۇرەسىنەن  VII الەم چەمپيوناتى تۇڭلىگىن ءتۇردى. الەمنىڭ 38  ەلىنەن پالۋاندار جينالعان دودا بەس سالماق دارەجەسىندە وتەدى.  دۇنيەجۇزىلىك قازاق كۇرەسى فەدەراتسياسىنىڭ  ۇيىتقى بولۋىمەن ءوتىپ جاتقان الەم چەمپيوناتى بارىسىندا تورەشىلەرگە ارنالعان سەمينار ۇيىمداستىرىلدى.

اتالعان فەدەراتسيانىڭ باس حاتشىسى نۇرلىبەك ەرماعامبەتوۆ شەتەلدەن كەلگەن كوماندالارداعى تورەشىلەرگە الەم چەمپيوناتى كەزىندە قالاي تورەلىك جاساۋ كەرەكتىگىن ءتۇسىندىردى. ەكراننان ارنايى دايىندالعان بەينەجازبا ارقىلى بەلدەسۋدە تورەشىلەردىڭ قازىلىق ەتۋدە قانداي ءىس-قيمىل جاساۋ كەرەكتىگىن ايتتى.

شەتەلدىك تورەشىلەر دە وزدەرىنىڭ كوكەيىندە جۇرگەن ساۋالدارىن جولداپ تۇشىمدى جاۋاپ الدى.

دۇنيەجۇزىلىك قازاق كۇرەسى فەدەراتسياسى تورەشىلەر القاسىنىڭ توراعاسى ماحمۇت-باقىت جاڭبىرباەۆ سەميناردا ءسوز الىپ، شەتەلدىك تورەشىلەردىڭ قازاق كۇرەسىنەن قازىلىق ەتۋگە كادىمگىدەي توسەلىپ قالعانىن جەتكىزدى. «بىرىككەن كۇرەس الەمىنىڭ» (UUW ) باعدارلاماسىنا ەنگىزىلگەن بۇل الەم چەمپيوناتى بارىسىندا قازىلىق ەتەتىن تورەشىلەر اقيقاتتان اتتامايدى دەپ سانايمىن. قازاق كۇرەسىنەن  الەم چەمپيوناتتارى بۇعان دەيىن التى رەت وتكىزىلدى. تورەشىلەرگە ەشقاشان وكپە-رەنىش ايتىلعان ەمەس. بۇل جولى دا قازىلار ءادىل تورەلىك ەتەدى دەپ سانايمىن. وتكەن ايدا عانا تۇركىمەنستاندا جابىق كەشەندەگى ازيا ويىندارى بولدى. قازاق كۇرەسى تۇڭعىش رەت جابىق كەشەندەگى ازيا ويىندارىنىڭ باعدارلاماسىنا قوسىلدى. مىنە وسى دودا كەزىندە شەتەلدىك تورەشىلەر قازاق كۇرەسى سايىسىندا وتە جاقسى قازىلىق ەتتى. ەشقانداي دا جاڭىلىسۋ، ۇپاي بەرۋدە قاتەلەسۋ بولعان جوق. دۇنيەجۇزىلىك قازاق كۇرەسى فەدەراتسياسى ءتول كۇرەسىمىزدى الەم ەلدەرىنە ناسيحاتتاپ فەدەراتسيالار اشىپ، سول ەلدەردە كۇرەستى  دامىتۋ ءۇشىن تورەشىلەردى دە دايارلاۋدى مىقتاپ قولعا الدى. ەلىمىزدىڭ تاجىريبەسى تولىسقان تورەشىلەرى شەتەلدەرگە بارىپ ارنايى سەمينار وتكىزىپ، تاجىريبەلەرىمەن ءبولىسىپ ءجۇر.  سونىڭ ناتيجەسىن كۇنى كەشە اشحاباد كىلەمىندە كوردىك. مينسكىدەگى الەم چەمپيوناتىندا دا تورەشىلەر بىلىكتىلىگىن پاش ەتەدى»، دەدى ماحمۇت-باقىت جاڭبىرباەۆ.

قۋانىش باجاق،

مينسك قالاسى (بەلارۋس)