Azııa chempıonaty: fınalǵa alty qazaq boksshysy shyqty

Taılandtyń Bangkok qalasynda ótip jatqan 22 jasqa deıingiler arasyndaǵy bokstan Azııa chempıonatynda Qazaqstannyń 11 boksshysy qarsylastarymen jartylaı fınalda qolǵap túıistirdi. Bul kezdesýlerde bes sportshymyz jeńilip, qola medaldy qanaǵat tutty. Al alty bylǵary qolǵap sheberi fınalǵa shyqty.

Jartylaı fınalda Sanjar Tashkenbaı (48 kg), Nursultan Altynbek (54 kg), Mahmud Sabyrhan (57 kg), Talǵat Syrymbetov (60 kg), Muhammedsabyr Bazarbaıuly (63,5 kg), Abzal Serik (67 kg), Sabyrjan Aqqalyqov (71 kg), Dıas Moljigitov (75 kg), Erasyl Jaqypbekov (80 kg), Renat Bekzat (92 kg) pen Amanat Sabyrǵalı (+92 kg) sharshy alańǵa kóterildi. Osylardyń ishinde beseýi fınalǵa shyǵa almaı qaldy. Eki jekpe-jek daýly boldy.

Qazaq boksshylarynan birinshi bolyp jekpe-jekke Qazaqstan chempıony Erasyl Jaqypbekov shyǵyp, birinshi mınýtta-aq qarsylasyn nokdaýnǵa jibergen edi. Alaıda tóreshiler kezdesýde jeńisti О́zbekstan boksshysy Jasýrbek Iýldoshevke berdi. Osylaısha Erasyl Jaqypbekov jarysty aıaqtap, qola medal ıelendi.

Sol sekildi taǵy bir qola medal ıegeri Talǵat Syrymbetovtyń da jekpe-jegi daýly boldy. 60 kıloǵa deıingi salmaqta ol jartylaı fınalda taılandtyq Phýthanet Rodsýkpen judyryqtasyp, birinshi raýndta ony nokdaýnǵa jibergen bolatyn. Bul jerde de tóreshiler upaıy sanymen taı boksshysy jeńdi dep sheshti. Sondaı-aq Muhammedsabyr Bazarbaıuly 63,5 kıloǵa deıingi salmaqta qola júldeger atandy. Tóreshiler bul jekpe-jekte de mońǵolııalyq Týlga Oıýnbaatarǵa jeńisti syılady. Upaı aıyrmasy da onsha kóp bolmady. Esep – 3:2.

Omsy kúni jartylaı fınalda Sanjar Tashkenbaı (48 kg), Nursultan Altynbek (54 kg), Mahmud Sabyrhan (57 kg), Abzal Serik (67 kg), Sabyrjan Aqqalyqov (71 kg) pen Dıas Moljigitov (75 kg) qarsylastaryn utyp, fınalǵa joldama aldy. Endi Sanjar Tashkenbaı ózbekstandyq Shodıerjon Melıkýzıevpen,  Nursultan Altynbek fıllıpındik Flınt Djaramen, Mahmud Sabyrhan alań ıesi Saravýt Sýkthetpen qolǵap túıistirse, Abzal Serik ózbekstandyq Behzod Hamıdovpen altyn júlde úshin aıqasady. Al Sabyrjan Aqqalyqov taǵy bir ózbek boksshysy Nurıslom Ismoılovpen kúsh synasady.

Dastan KENJALIN,

ASTANA