SportPress.kz قازاقستان سپورت جاڭالىقتارى
قاراعاندى وبلىسىندا قارتتار ۇيىندە تۇرسا دا بالالاردى جاتتىقتىرىپ جۇرگەن باپكەر بار. جاس كەزىندە تالاي شىڭدى باعىندىرعان ول ەندى شاكىرتتەرىن جەتىستىككە جەتەلەمەك، دەپ حابارلادى «حابار 24» تەلەارناسى.
جاسى 80-گە تاياسا دا سپورتتى سەرىك ەتكەن ەسىركەپ جاقسىباەۆ ءوزى تۇرىپ جاتقان شاحان كەنتىندە مەكتەپ وقۋشىلارىنا بوكستان شەبەرلىك ساعاتىن وتكىزىپ ءجۇر. ول كۇندەلىكتى 2 ساعات ۋاقىتىن سپورتقا ارنايدى. بۇل – بالا كەزىنەن قالىپتاسقان ادەتى. «قر ەڭبەك سىڭىرگەن جاتتىقتىرۋشىسى» دەگەن سپورتتىق دارەجەسى بار.
ونى شاحان كەنتىندە ءبارى بىلەدى. ءتىپتى سەرىك ساپيەۆتى دە جاتتىقتىرعان. ءبىر ەرەكشەلىگى، ول بىزگە بوكسشى ءوز تالپىنىسى بار نامىستى، مىقتى ادام بولۋ كەرەك دەپ ۇيرەتتى، — دەيدى جەرگىلىكتى وقۋشى باقىت اسان.
ەسىركەپ جاقسىباەۆ بۇرىنعى قاراعاندى دەنە شىنىقتىرۋ تەحنيكۋمىنىڭ تۇلەگى. ودان سوڭ سپورت شەبەرى اتانعان ول قازاق كسر بىرىنشىلىگىنىڭ جۇلدەگەرى، رەسپۋبليكالىق جارىستاردىڭ جەڭىمپازى بولعان. قىسقاسى، جاس شاعىندا ەۋروپا ەلدەرىنىڭ رينگتەرىندە جاسىنداي جارقىلداعان.
شاكىرتتەرىم كوپ بولدى. ەكەۋى الەمدىك تۋرنيرلەردەن جەڭىسكە جەتتى. سولارمەن ماقتانامىن. مەن ءوزىم قارتتىق دەگەندى بىلمەيمىن، بار ءومىرىمدى سپورت سالاسىنا ارنادىم. قازىر دە وسى سپورتتىڭ ارقاسىندا اۋرۋ-سىرقاۋدى بىلمەيمىن. ادام كوپ ءجۇرۋ، كوپ جۇگىرۋى كەرەك، — دەيدى ەسىركەپ جاقسىباەۆتىڭ ءوزى.
بىلعارى قولعاپ شەبەرىنىڭ اقىندىعى دا ءبىر توبە. سپورت زالىنان شىققان سوڭ قالىڭ داپتەرىن قولعا الادى ەكەن. تۋعان جەرگە دەگەن ماحابباتىن، ماماندىعىنا دەگەن ادالدىعىن قاريا ولەڭ ەتىپ ورىس تىلىندە جازادى. بۇدان بولەك، تاعدىرلاستارىن دا سپورتپەن، بيمەن اينالىسۋعا ۇگىتتەيدى.
ءبيدى وتە قاتتى جاقسى كورەدى. سوسىن ولەڭ شىعارعاندى ۇناتادى. كۇندە تاڭەرتەڭ وسى مەكمەدەن باستاپ، شاحتينسك قالاسىنا دەيىن جۇگىرىپ بارىپ كەلەدى. ەسىركەپ قاماي ۇلىنىڭ تۋعان ءىنىسى بار. ول وسىندا كىسى ءجيى كەلىپ تۇرادى، — دەيدى «شاحتينسك قالاسىنىڭ ارناۋلى الەۋمەتتىك كىزمەت كورسەتۋ ورتالىعى» كمم ديرەكتورى ەرلان جاۋكىموۆ.
جاتتىقتىرۋشى 2011 جىلدان بەرى قارتتار ۇيىندە ەكەن. ءبىر ۇلى قازا تاپقان، ال قىزى شەتەلدە تۇرادى. قازىر قارتتار ۇيىندە وزىمەن تاعدىرلاس 90 ادام بار.
ەركەعالي بەيسەنوۆ،
استانا
