اقتاۋداعى مۇز ايدىنى عيماراتىنىڭ قۇرىلىسى نەگە توقتاپ تۇر؟

اقتاۋ قالاسىنىڭ 32-شاعىن اۋدانىنداعى مۇز ايدىنى عيماراتىنىڭ قۇرىلىسى جىلدار بويى سول قالپىندا توقتاپ تۇر. ەكىنشى رەت مەرزىمىن ۇزارتقاننىڭ وزىندە، بىلتىر جازدا ءبىتۋى ءتيىس ەدى. ەش وزگەرىس بايقالمايدى.

ەندى نىسان پاسپورتىنداعى اياقتالۋ مەرزىمىن بوياپ ءوشىرىپ تاستاپتى. ءويتىپ كىمدى الدايمىز؟! وسىدان سوڭ ماڭعىستاۋدا قىسقى سپورت تۇرلەرى قايدان داميدى؟ جازدا كۇنگە كۇيىپ ءجۇرىپ، ارنايى باقىلاپ ەدىم. قىستىڭ بوراندى كۇنىندە تاعى دا تەكسەرىپ كەتتىم.

بۇل نىسان اۆتورلىق قاداعالاۋ مەن تەحنيكالىق قاداعالاۋدان بولەك، قوعامدىق قاداعالاۋىمىزدا دا تۇرعانىن ۇلىقتاردىڭ ۇمىتپاعانى ءجون. بۇرىنعى وبلىس اكىمىنىڭ ءبىرىنشى ورىنباسارى وسى مۇز ايدىنىنا بولىنگەن قاراجاتتى قالتاسىنا سالىپ العان جاعدايدان كەيىن فينپول، انتيكور، قوعام بەلسەندىلەرى ءجيى تەكسەرىپ تۇرۋى كەرەك. مەن وسى داۋلى قۇرىلىسقا قاتىستى جۋرناليستىك زەرتتەۋ جۇرگىزدىم.

«مۇز ايدىنى عيماراتى نە سەبەپتى توقتاپ تۇر؟ قاشان پايدالانۋعا بەرىلەدى؟» دەگەن سۇراقتارىما ماڭعىستاۋ وبلىستىق دەنە شىنىقتىرۋ جانە سپورت باسقارماسىنىڭ باسشىسى مىندەتىن اتقارۋشى ايبەك يماشەۆ جاۋاپ بەردى.

سونىمەن… اقتاۋ قالاسىنداعى مۇز سارايىن سالۋ جانە پايدالانۋ جۇمىستارى مەملەكەتتىك-جەكەمەنشىك ارىپتەستىك اياسىندا قولعا الىنعان. «مەملەكەتتىك ارىپتەس» اتىنان ايماق اكىمدىگى وكىلەتتىك بەرگەن ماڭعىستاۋ وبلىسىنىڭ دەنە شىنىقتىرۋ جانە سپورت باسقارماسى 2018 جىلعى 26 ناۋرىز كۇنى «جەكەشە ارىپتەس» تاراپىنان «ن+ن TECHNIKA، spol. s r.o.» جشس-مەن بىرگە ەكىجاقتى كەلىسىم-شارت جاساعان.

شارتتا كورسەتىلگەن مىندەتتەمەلەردىڭ ورىندالماۋىنا بايلانىستى كەيىن «مەملەكەتتىك ارىپتەس» ول شارتتى بۇزۋ تۋرالى سوتقا تالاپ ارىز بەرگەن. ال «جەكەشە ارىپتەس» قۇرىلىستىڭ تولىق اياقتالماۋىنا جانە كەشىگۋىنە بايلانىستى مىناداي ءتۇرلى سەبەپتەردى العا تارتادى:

ەڭ الدىمەن، سىبايلاس جەمقورلىق ءىسى. تەرگەۋ ناتيجەلەرى بويىنشا 2019 جىلى جابدىقتارى بار قويمالار مورلەنىپ، جۇمىستار 2019 جىلدىڭ سوڭىنا دەيىن توقتاتىلعان.

ودان كەيىن 2019-2020 جىلدارى Covid-19 ىندەتىنىڭ سالدارىنان قازاقستان مەن سلوۆاكياداعى كارانتيندىك شەكتەۋلەرگە بايلانىستى جەكەشە ارىپتەس وكىلدەرىنىڭ جانە ينۆەستيتسيالىق بانكتىڭ تەحنيكالىق قاداعالاۋ وكىلدەرىنىڭ ەلىمىزگە كەلۋگە مۇمكىندىگى بولماعان.

سونداي-اق قۇرىلىس جۇمىستارىن باستاۋ ءۇشىن 2021 جىلى مەردىگەر «شالقارپرومحولدينگ» جشس-مەن شارت جاسالادى. مەردىگەر 2021 جىلدىڭ باسىندا الدىن الا تولەم جاساپ، قۇرىلىس-مونتاج جۇمىستارىن باستاپ، بىراق ءبىر ايدان كەيىن جۇمىسىن توقتاتقان. جەكەشە ارىپتەس جۇمىستارىن جۇرگىزبەگەنى ءۇشىن مەردىگەر سوتقا تالاپ ارىز بەرگەن. وسى ءىس بويىنشا 2022 جىلعى قاراشاداعى سوتتىڭ شەشىمى جەكەشە ارىپتەستىڭ پايداسىنا شەشىلگەن.

جەكەشە ارىپتەس 2021 جىلدىڭ سوڭىندا «اتامەكەن سمك» جشس-مەن قۇرىلىستى جالعاستىرۋ ءۇشىن شارتقا قول قويىپ، جۇمىستى 2022 جىلعى اقپاندا جاڭا مەردىگەر باستايدى.

بۇل رەتتە 2022 جىلدىڭ ءساۋىر ايىنان باستاپ قۇرىلىس جۇمىستارىنىڭ باستالۋىمەن قاتار، جەكە ارىپتەس جەر ۋچاسكەسىن جالعا الۋ مەرزىمىن ۇزارتۋ، بۇرىن بەرىلگەن تەحنيكالىق شارتتاردىڭ مەرزىمىن ۇزارتۋ ءۇشىن جانە ءمجا نەگىزگى شارتىنا قوسىمشا كەلىسىمگە قول قويۋ جونىندەگى بىرلەسكەن كەڭەس وتكىزگەن.

سونىڭ نەگىزىندە 2022 جىلعى 8 شىلدە كۇنى جەر ۋچاسكەسىن جالعا الۋ مەرزىمى، ال جەلتوقسان ايىندا ينجەنەرلىك جەلىلەرگە قوسىلۋدىڭ تەحنيكالىق شارتتارى ۇزارتىلعان.

«سلوۆاكيانىڭ ينۆەستيتسيالىق بانكى» جوبانى قارجىلاندىرۋدى جالعاستىرۋ جانە قوسالقى ستانتسيانىڭ قۇرىلىسىن سالۋ ءۇشىن شارتقا سايكەس مەملەكەتتىك سەرىكتەس نەمەسە جەكە سەرىكتەستى انىقتاۋ ماسەلەسىن قاراستىرىپ جاتىر ەكەن. ەگەر جەكە سەرىكتەس بولسا، وندا بۇل تارماق بويىنشا قوسىمشا كەلىسىمگە تۇزەتۋلەر ەنگىزىلىپ، ەكى تاراپتان ماقۇلدانىپ، بەكىتىلۋى كەرەك ەكەن. بەكىتىلگەن قوسىمشا كەلىسىم اياسىندا قۇرىلىس جۇمىستارى جالعاسادى دەيدى.

قانداي جاعدايدا دا قاراجات پەن ۋاقىتتان ۇتىلىپ جاتىرمىز. كەيىن كەلگەن اكىمدەر مەن جۇمىسقا ەندى كىرىسكەن مەكەمەلەر وزدەرىنە دەيىنگى ارىپتەستەرىنىڭ ارەكەتىنە سىلتەي سالماي، وسى جۇمىستى جىلدام، جاۋاپكەرشىلىكپەن جانە ساپالى اياقتاۋىن كۇتەمىز.

ايبەك مۇحانوۆ،

قازاقستان جۋرناليستەر وداعىنىڭ مۇشەسى.

ماڭعىستاۋ وبلىسى،

اقتاۋ قالاسى.