SportPress.kz Qazaqstan sport jańalyqtary
Mánerlep syrǵanaýshy, 2019 jylǵy álem vıe-chempıony Elızabet Tursynbaeva Almaty qalasy máslıhatynyń depýtaty bolǵysy keletinin aıtty. Ol kandıdat bolyp saılanatynyn habarlady.
Menimen jaqsy aralasatyn adamdar kez kelgen kásipti urshyqsha úıirip áketetinimdi biledi. Men qandaı jumys, sharýa bolsyn, bárin tııanaqty etip, janashyrlyqpen isteımin. Jarysqa daıyndyqqa asa jaýapkershilikpen qaraımyn. Sabaǵymdy da jaqsy oqımyn.
Men kún saıyn jańa bıikterge jetkim keledi. Bul – meniń boıyma bala kezimnen sińgen qasıet. Kásipqoı sportshynyń maqsaty – kóp eńbek etip, kóp ter tógý. Sonda ǵana maqsatqa jetemiz. Maǵan senseńizder, senimdi aqtaýǵa tyrysamyn. Men AMANAT partııasynan Almaty qalasy máslıhatynyń depýtattyǵyna kandıdat bolyp saılandym, – dedi ol.
Ol odan ári bolashaqta elimizge jaqsy ózgerister ákeletin úlken tulǵa bolǵysy keletinin aıtty.
Bul – bastamasy ǵana. Syrttan qarap, júıege shaǵymdanyp otyrý – ońaı, áreket etý – odan da qıyn. Sondyqtan men úshin bul ońaı qadam emes. Sizder meni qoldasańyzdar, bári oıdaǵydaı bolady, – dedi sportshy Instagram-daǵy paraqshasynda.
Elızabet Tursynbaeva – 22 jasta. Álem chempıonatynyń (2019) jáne Qysqy Ýnıversıadanyń (2019) kúmis júldegeri, Qazaqstannyń tórt dúrkin chempıony, Azııa oıyndarynyń qola júldegeri (2017). Ol – eresekter arasynda jalǵyz syrǵanaýdan 4 ret taza sekirýdi oryndaǵan alǵashqy áıel sportshy.
Dastan KENJALIN,
ASTANA
