قازاقستان قۇراماسى دامۋ كۋبوگىندا كۇمىس جۇلدەگەر اتاندى (ۆيدەو)

بەلارۋستىڭ استاناسى مينسك قالاسىندا دامۋ كۋبوگى ءۇشىن حالىقارالىق تۋرنير اياقتالدى.

فينالدا قازاقستان مەن رەسەي جاسوسپىرىمدەر قۇرامالارى كەزدەستى. ماتچتا وتانداستارىمىز قارسىلاستارىنان 1:3 ەسەبىمەن ۇتىلىپ، وسىمەن ەكىنشى رەت كۇمىس جۇلدەگە يە بولدى (2021 جىلى فينالدا تاجىكستان جاسوسپىرىمدەر قۇراماسىنان جەڭىلگەن بولاتىن، — رەد.)

قازاقستان قۇراماسىندا جالعىز گولدى جارتىلاي قورعاۋشى ءىلياس ءابىل سالدى. ءسويتىپ، ول تۋرنيردەگى ءۇشىنشى گولىن سوقتى. ال جاسوسپىرىمدەر كوماندانىڭ قاقپاشىسى ابىلقايىر الياقبار دامۋ كۋبوگىنىڭ ۇزدىك قاقپاشىسى اتاندى.

بۇعان دەيىن قازاقستان فۋتبولشىلارى وزبەكستاندى 3:0، رەسەيدىڭ 16 جاسقا دەيىنگى جاسوسپىرىمدەر قۇراماسىن 1:0، بەلارۋستى 1:0 ەسەبىمەن جەڭگەن بولاتىن.

قازاقستان جاسوسپىرىمدەر قۇراماسى دامۋ كۋبوگى ويىندارىنا ءتورتىنشى رەت قاتىستى. كوماندا العاش رەت 2014 جىلى جالاۋى جەلبىرەگەن جارىستا كۇش سىناسسا، ودان كەيىن  2018 جانە 2021 جىلدارى دامۋ كۋبوگىنىڭ جاسىل الاڭىنا شىقتى.

قازاقستان U-17 – رەسەي U-17 – 1:3 (1:1)

گولدار: ىلياس ءابىل 8 – ۆاديم پاستۋشكوۆ 2، يۆان بوبەر 68 (پەنالتي)، ەگور سىسوەۆ 73

داستان كەنجالين،

استانا