باتىس قازاقستان وبلىسىندا بالالارعا قول كوتەرگەن باپكەرگە ءىس قوزعالدى

باتىس قازاقستان وبلىسىندا بالالارعا قول كوتەرگەن جاتتىقتىرۋشىعا قاتىستى اكىمشىلىك ءىس قوزعالدى. بۇل تۋرالى قازاقپاراتتىڭ ءتىلشىسى حابارلادى.

بقو پوليتسيا دەپارتامەنتىنىڭ رەسمي وكىلى بولاتبەك نۇرعوجيننىڭ ايتۋىنشا، وقيعا 13 اقپان كۇنى 2013 جىلعى ءجاسوسپىرىمنىڭ جاراقات پۋنكتىنە حابارلاسقاننان كەيىن بەلگىلى بولدى.

ونىڭ سوزىنە قاراعاندا، بالاعا ساماي تۇسى كوگەرگەن دەگەن دياگنوز قويىلعان.

سول كۇنى ءجاسوسپىرىمنىڭ اناسى جاتتىقتىرۋشىعا قاتىستى شارا قولدانۋ جونىندە شاعىم ءتۇسىردى. بالاعا قول كوتەرگەن شىڭعىرلاۋ اۋىلىنداعى دەنە شىنىقتىرۋ-ساۋىقتىرۋ كەشەنىنىڭ 1974 جىلعى باپكەرى انىقتالدى. 14 اقپان كۇنى ءجاسوسپىرىمنىڭ اناسىنان ءىستى قاراۋدى توقتاتۋ جانە تاراپتاردىڭ كەلىسىمگە كەلگەنى جونىندە تاعى ءبىر ارىز ءتۇستى. الايدا شىڭعىرلاۋ اۋدانى پوليتسيا ءبولىمىنىڭ قىزمەتكەرلەرى باپكەرگە قاتىستى قر اكىمشىلىك قۇقىقبۇزۋشىلىق كودەكسى 73-2-بابى 1-بولىگىنە (ۇرىپ-سوعۋ) سايكەس اكىمشىلىك حاتتاما تولتىردى. بۇل باپ بويىنشا ايىپتى دەپ تانىلعان ادام ون ايلىق ەسەپتىك كورسەتكىش مولشەرىندە ايىپپۇل سالۋعا نەمەسە ون تاۋلىككە دەيىنگى مەرزىمگە اكىمشىلىك قاماققا الۋعا جازالانادى. بقو دەنە شىنىقتىرۋ جانە سپورت باسقارماسىنا باپكەردىڭ ءتارتىبىن قاراۋ جانە تارتىپتىك شارا قولدانۋ جونىندە ۇسىنىم جولداندى،- دەدى ب.نۇرعوجين.

بقو دەنە شىنىقتىرۋ جانە سپورت باسقارماسى باسشىسىنىڭ ورىنباسارى جەڭىس نىعمەتۋللين بولعان وقيعاعا قاتىستى تۇسىنىك بەردى.

ونىڭ ايتۋىنشا، 13 اقپان كۇنى شىڭعىرلاۋ اۋدانى بالالار-جاسوسپىرىمدەر سپورت مەكتەبىندەگى سامبو كۇرەسى ءبولىمىنىڭ جاتتىقتىرۋشىسى قايسار قۇسايىنوۆ جاتتىعۋ كەزىندە تاربيەلەنۋشىلەر ا.مىرزاحاندى جانە ن.جۇرماعامبەتتى سوققىعا جىققان.

سول كۇنى وقۋشىلاردىڭ اتا-انالارىنان ارىز ءتۇسىپ، ق.قۇسايىنوۆ جەرگىلىكتى پوليتسيا بولىمىنە شاقىرتىلدى. جاتتىقتىرۋشى ق.قۇسايىنوۆ بالالاردىڭ اتا-انالارىنان كەشىرىم سۇرادى. سپورتشىلاردىڭ اتا-انالارى جاتتىقتىرۋشىنى كەشىرىپ، ءوز ارىزدارىن كەرى قايتاردى. دەگەنمەن شىڭعىرلاۋ دەنە شىنىقتىرۋ-ساۋىقتىرۋ كەشەنىنىڭ اكىمشىلىگى بولعان وقيعا تۋرالى ۆيدەونى تۇرعىندار اراسىندا تاراتىپ جىبەردى. كۇنى بۇگىن ق.قۇسايىنوۆ ۇلى الديار سايىننىڭ استانا قالاسىندا ءوتىپ جاتقان دزيۋدودان جاسوسپىرىمدەر اراسىنداعى قازاقستان چەمپيوناتىنا قاتىسۋىنا بايلانىستى ءوز قاراجاتى ەسەبىنەن ىسساپارعا كەتتى. قىزمەتكە 20 اقپان كۇنى شىعادى. جۇمىسقا شىققان سوڭ ق.قۇسايىنوۆتىڭ ءىس ارەكەتىنە باعا بەرۋ ءۇشىن قىزمەتتىك تەكسەرىس جۇرگىزىلەدى، — دەدى ج.نىعمەتۋللين.

بۇعان دەيىن ورالدا جوعالىپ كەتكەن وقۋشى قىزدىڭ بەس كۇننەن كەيىن امان-ەسەن تابىلعان بولاتىن.

داستان كەنجالين،

استانا