پولشا حوك-تان وليمپياداعا رەسەي سپورتشىلارىن قاتىستىرماۋدى تالاپ ەتتى

پولشا حالىقارالىق وليمپيالىق كوميتەتكە (حوك) وليمپيالىق ويىندارعا رەسەيلىكتەردى قاتىستىرماۋ جونىندە ۋلتيماتۋم قويدى. بۇل تۋرالى «ديالوگ.ua» حابارلادى.

باتىس كواليتسياسىنا كىرەتىن ەلدەردىڭ ءبىرى 2024 جىلى پاريجدە وتەتىن وليمپياداعا رەسەيلىك جانە بەلارۋستىك سپورتشىلار قاتىساتىن بولسا، ويىندارعا بويكوت جاريالاۋعا دايىن ەكەنىن ءبىلدىردى، – دەلىنگەن حابارلامادا.

ازىرشە حوك ءوزىنىڭ پاريجدە 2024 جىلى وتەتىن وليمپياداعا رف جانە بەلارۋس اتلەتتەرىن بەيتاراپ مارتەبە نەگىزىندە جىبەرۋ جونىندەگى يدەياسىن قورعاشتاۋمەن كەلەدى. ال ۋكرايناداعى سوعىس بىتكەنگە دەيىن رەسەيلىكتەر مەن بەلورۋستاردى حالىقارالىق جارىستاردىڭ بارىنەن تولىق وقشاۋلاپ تاستاۋدى تالاپ ەتۋشى كواليتسيانىڭ اۆانگاردىنا جۇرگەن پولشا بۇل ماسەلەگە قاتىستى تەكەتىرەستىڭ سوڭىنا دەيىن باراتىنىن بايقاتىپ، وليمپياداعا بويكوت جاريالاۋعا دايىن ەكەنىن جەتكىزدى.

پولشا سپورتىنىڭ باسشىسى كاميل بورتنيچۋك ەگەر رف مەن بر سپورتشىلارى جارىسقا جىبەرىلەتىن بولسا، ءوز ەلىنىڭ فرانتسيا استاناسىندا وتەتىن ويىندارعا بويكوت جاريالاۋعا دايىن ەكەنىن راستاپ بەردى، – دەلىنگەن پورتالدا.

بۇعان دەيىن  الەمنىڭ 35 ەلى رەسەي مەن بەلارۋس سپورتشىلارىن 2024 جىلعى پاريج وليمپياداسىنان تولىق وقشاۋلاۋ، ولاردى ەشقانداي دا بەيتاراپ تۋ استىندا جارىس جولىنا شىعارماۋ جونىندە باستاما كوتەرگەن بولاتىن. ال جاقىندا حوك پرەزيدەنتى توماس باح وليمپيالىق ويىندارعا كىمدەردىڭ قاتىساتىندارىن ۇكىمەتتەر انىقتاۋى ءتيىس ەمەس دەگەن سىڭايدا جاۋاپ قايتاردى.

الايدا، رەسەيلىكتەر مەن بەلورۋستاردى ويىندارعا قاتىستىرماۋ جونىندە باستاما كوتەرىپ جۇرگەن كواليتسيا ەلدەرى بۇل كۇرەستىڭ سوڭىنا دەيىن باراتىن سياقتى. ەگەر ولار دەگەندەرىنە جەتپەسە، وليمپياداعا جاپپاي بويكوت جاريالانۋى ابدەن مۇمكىن.

داستان كەنجالين،

استانا