ەۋروپا پارلامەنتى رەسەي سپورتشىلارىنىڭ جارىستارعا قاتىسۋلارىنا قارسى شىقتى

ەۋروپا پارلامەنتى رەسەيلىكتەردى 2024 جىلعى وليمپيالىق ويىندارعا جىبەرۋ رەسمي پوزيتسياعا ساي كەلمەيتىنىن مالىمدەدى. بۇل تۋرالى dw.com حابارلادى.

ەۋروپارلامەنت رەسەيلىكتەر مەن بەلورۋستاردى بەيتاراپ جالاۋ استىندا جارىستارعا قاتىسۋعا رۇقسات ەتۋ رف مەن بەلارۋستى كوپ قىرلى وقشاۋلاۋ جونىندەگى شەشىمگە قايشى كەلەدى دەپ شەشتى، – دەلىنگەن حابارلامادا.

ەۋروپارلامەنت دەپۋتاتتارى حالىقارالىق وليمپيالىق كوميتەتتىڭ رەسەيلىكتەر مەن بەلورۋستارعا 2024 جىلعى جازعى وليمپياداعا بەيتاراپ جالاۋ استىندا قاتىسۋعا رۇقسات بەرۋ جونىندەگى ۇسىنىسىنا ەۋروپا وداعى زاڭ شىعارۋشى ورگانىنىڭ جاۋابى رەتىندەگى رەسمي پوزيتسياسىن بەكىتىپ بەردى. پارلامەنتاريلەر حوك-تىڭ بۇل يدەياسىنىڭ ءوزىن قاتتى ايىپتاپ، مۇنىڭ رەسەي مەن بەلارۋستى كوپ قىرلى وقشاۋلاۋ پرينتسيپىنە وراسان زور نۇقسان كەلتىرەتىنىن مالىمدەدى.

مۇنىڭ ءبارى ەۋروپا پارلامەنتى قابىلداعان قاراردا اتاپ كورسەتىلگەن. قۇجاتتى 444 دەپۋتات قولداپ داۋىس بەردى، 26-سى قارسى بولدى، تاعى 37 ادام قالىس قالدى.

پارلامەنتاريلەر ەۋرووداققا مۇشە ەلدەردىڭ جانە باسقا مەملەكەتتەردىڭ ۇكىمەتتەرىن حوك-كە قىسىم جاساپ، تۇپكى قورىتىندىدا ونىڭ رف مەن بر وكىلدەرىنىڭ وليمپياداعا قاتىسۋلارىنا تىيىم سالۋىنا ىقپال ەتۋگە شاقىردى.

پاريجدەگى ويىندارعا رەسەيلىك جانە بەلورۋس سپورتشىلارىنىڭ جىبەرىلۋ ىقتيمالدىلىعى كۇللى سپورت الەمى ءۇشىن ماسقارا، – دەلىنگەن قۇجاتتا.

بۇعان دەيىن پولشا سپورت مينيسترلىگى پاريجگە رەسەي جانە بەلارۋس سپورتشىلارى باراتىن بولسا، 2024 جىلعى وليمپياداعا بويكوت جاريالاۋعا دايىن ەكەندەرىن مالىمدەگەن ەدى. مۇنداي قادام حوك-پەن كەلىسىم تابىسسىز اياقتالعان جاعدايدا ىسسكە اسىرىلادى.

بۇدان باسقا، ۇلىبريتانيا پولشانىڭ مالىمدەمەسىنە تۇسىندىرمە بەرە كەلىپ، الەمنىڭ جەتەكشى ەلدەرىنىڭ بۇل ماسەلە جونىندەگى پوزيتسياسىنا حوك-تىڭ قۇلاق اسپاۋى مۇمكىن ەمەس ەكەنىن العا تارتتى. ايتپەسە، مۇنىڭ سوڭى ويىندارعا جاپپاي بويكوت جاريالاۋعا ۇلاسىپ كەتۋى ىقتيمال.

حوك-تىڭ باسشىسى توماس باح رەسەيلىكتەر مەن بەلورۋستاردى وليمپياداعا جىبەرۋ پوزيتسياسىن قورعاۋدى جالعاستىرىپ وتىر. ول مۇنى كوميتەتتىڭ «ادامداردى بىرىكتىرۋ مەن ادام قۇقىعىن قورعاۋعا» ۇمتىلىپ وتىرعانىمەن بايلانىستىرادى. بىراق ول سول «ادام قۇقىعىن» ۋكراينادا رەسەي باسقىنشىلارى مەن ونىڭ وداقتاسى بەلارۋستىڭ اياققا تاپتاپ جاتقانىن تۇسىندىرگەن جوق.

داستان كەنجالين،

استانا