Búgin Bolgarııada bokstan Strandja kýbogy úshin týrnıri bastalady

Búgin Bolgarııanyń astanasy – Sofııa qalasynda bokstan halyqaralyq «Strandja-2023» týrnıri bastalady.

Bıyl 74-ret ótkizilgeli otyrǵan týrnırge Qazaqstan quramasy da qatysqaly jatyr. Bul doda sońǵy jyldary buryn Germanııanyń Galle qalasynda ótip kelgen básekeden asyp túsip, sonyń ornyna «kishi álem chempıonaty» degen janama ataýǵa ıe bola bastady.

Qazaqstan quramasy Bolgarııanyń astanasyna jetti. Komandany quramanyń bas jattyqtyrýshysy Myrzaǵalı Aıtjanov bastap alyp bardy.

Jattyqtyrýshylar shtabynyń aıtýynsha, týrnırge elimizdiń negizinen ekinshi quramasy attandy. Qazirgi quramda birinshi nómirli 2-3 bylǵary qolǵap ıesi ǵana bar. Qalǵandary – ekinshi-úshinshi nómirli boksshylar. Jol júrýge 3-4 kún qalǵanda, komanda kapıtany Aslanbek Shymbergenovtiń burynnan bar jaraqaty syr berip, týrnırge bara almaıtyny belgili boldy. Sonymen, 71 kelige deıingi salmaq boıynsha týrnırge elimizden eshkim qatyspaı qalaıyn dep tur.

Keshe jarysqa barǵan boksshylar tarazyǵa tartyldy. Jerebege qatysyp, alǵashqy qarsylastaryn anyqtady.

Osyǵan oraı, búgin ulttyq quramadan sharshy alańǵa tek 60 keli salmaqtaǵy Erasyl Tańqaıdyń ǵana shyǵatyny belgili boldy. Ol ıtalıan Darıel Salernomen judyryqtasady. Al 21 aqpanda birden 4 boksshymyz rıngke kóteriledi. Olardyń arasynda 54 keli salmaqtaǵy Bekzat Aldamjarov franııalyq Bılal Bonnamamen, 57 keli salmaqtaǵy Orazbek Asylqulov ırland Iýde Kallaharmen, 63,5 keli salmaqtaǵy Ertýǵan Zeınýlınov ıspan Olıver Ibarremen, 67 keli salmaqtaǵy Temirhan Tezek bolgar Plamen Iankovpen kúsh synasady.

Odan keıin 22 aqpanda 75 keli salmaqtaǵy Nurqanat Raıys avstralııalyq Domınık Molınaromen, 80 keli salmaqtaǵy Bekzad Nurdáýletov serbııalyq Artem Agelevpen, 92 keliden aýyr salmaqtaǵy Qamshybek Qońqabaev nıderlandtyq Sten Bertnıspen qolǵap túıistiredi.

Aqpannyń 23-inde 48 keli salmaqtaǵy Ernur Qaırat grýzın Lýka Kýblashvılımen, 51 keli salmaqtaǵy Kenje Muratuly úndilik Bashýamatra Chonghanmen, 92 keli salmaqtaǵy Abzal Quttybekov grýzııalyq Artem Iordanıanmen bettesedi. Al 86 keli salmaqtaǵy Bekzat Tańatar ózbek Shohjahon Abdýllaev pen bolgar Krıstıan Dımıtrovtyń qaı jeńgenimen kezdesedi.

20-22 aqpan kúnderi týrnırde irikteý shaıqastary ótse, 23 aqpanda shırek fınaldyq, 25 aqpanda jartylaı fınaldyq jekpe-jekter bolady. Al 26 aqpanda fınaldyq kezdesýge kezek keledi.

Eskerte ketetin bir nárse, Sofııa men Astananyń arasyndaǵy ýaqyt beldeýi aıyrymy – 4 saǵat.

Taǵy bir aıtatyn jaıt, О́zbekstan quramasy týrnırge 27 boksshysyn apardy. Olarda asa aýyr salmaqta óz eliniń namysyn jalǵyz Bahodır Djalolov qorǵaıdy. Qalǵan salmaqtardyń árbirinde sharshy alańǵa 2-3 boksshydan shyǵatyn boldy. Olardyń arasynda Rýslan Abdýllaev (63,5 kg), Saıdjamshıd Jafarov (71 kg) pen Madııar Saıdrahımov (92 kg) esimdi ulty qazaq jigitter de bar.

Týrnırge Qazaqstan áıelder quramasy barǵan joq.

Dastan KENJALIN,

ASTANA