ستراندجا كۋبوگى: قازاقستان بوكسشىلارىنىڭ ەكەۋى جەڭىپ، ەكەۋى جەڭىلدى (ۆيدەو)

بولگاريانىڭ استاناسى – سوفيا قالاسىندا حالىقارالىق ستراندجا كۋبوگى ءۇشىن ءتۋرنيرىنىڭ 1/8 فينالدىق جەكپە-جەكتەرى بولدى.

سوڭعى كەزدەرى كوكجيەكتەن ىعىسىپ قالعان گەرمانيانىڭ گاللە قالاسىنداعى حالىقارالىق جارىستىڭ ورنىنا «كىشى الەم چەمپيوناتى» اتانىپ جۇرگەن «ستراندجا» ءتۋرنيرى جىلدان-جىلعا ءوزىنىڭ بەدەلىن ارتتىرىپ كەلەدى.

ءتۋرنيردىڭ ءۇشىنشى كۇنى قازاقستاندىقتار ساپىنان رينگكە ءتورت بوكسشى كوتەرىلىپ، ولاردىڭ ەكەۋى جەڭىسكە جەتسە، ەكەۋى جەڭىلىستىڭ اششى ءدامىن تاتۋعا ءماجبۇر بولدى.

ەندى ءبارىن رەتىمەن ايتايىق. شارشى الاڭعا قازاقستان كومانداسىنان ءبىرىنشى بولىپ شىققان 60 كەلىگە دەيىنگى سالماقتاعى ەراسىل تاڭقاي كۇتپەگەن جەردەن فيليپپيندىك پول دجۋلايفەر باسكوننان ۇپايلار ءبولىسى نەگىزىندە ۇتىلىپ قالدى. بۇدان كەيىن وزبەك مۋجيبۋللو تۋرسۋنوۆپەن ءپرينتسيپتى باسەكە وتكىزگەن ەرتۋعان زەينۋللينوۆ تورەشىلەردىڭ ءبىر اۋىزدى شەشىمىمەن جەڭىلىس تاپتى.

ودان كەيىن سوڭعى ەكى بوكسشىمىز قۋانتتى. اۋەلى 75 كەلىگە دەيىنگى سالماقتاعى نۇرقانات رايىس  (سۋرەتتە) اۆستراليالىق دومينيك مولينارومەن كەزدەستى. ايقاس تۇگەلىمەن ءبىزدىڭ بوكسشىنىڭ باسىمدىعىمەن بولدى تورەشىلەر دە مۇنى دۇرىس باعالادى. ەسەپ – 5:0. ءسويتىپ، ازيا چەمپيوناتىنىڭ كۇمىس جۇلدەگەرى كوماندادان ءبىرىنشى بولىپ شيرەك فينالعا قادام باستى.

ال 92 كەلىگە دەيىنگى اۋىر سالماقتاعى قامشىبەك قوڭقاباەۆ نيدەرلاندتىق ستەن بەرتەنسپەن جەكپە-جەگىنە باسىنان تىڭعىلىقتى دايىندىقپەن كەلگەنىن بايقاتتى. ول ۋاقىت ۇزاعان سايىن ءوزىنىڭ باسىمدىعىن ەسەلەي ءتۇسىپ، قارسىلاسىن تىعىرىققا تىرەي بەردى. اقىرىندا ەكىنشى راۋندتا رينگتىڭ بەسىنشى بۇرىشىن ىزدەي باستاعان باسەكەلەسىن تەرەڭ نوكاۋتقا جىبەردى.

بۇگىن شيرەك فينالدىق شايقاستار باستالادى. بۇل كۇنى 48، 54، 60، 67، 71، 86 كەلىلەرگە دەيىنگى جانە 92 كەلىدەن اۋىر سالماقتارداعى بىلعارى قولعاپ شەبەرلەرى جارتىلاي فينالعا شىعۋ ءۇشىن قولعاپ تۇيىستىرەدى.

تۋرنيردە بەكزات الدامجاروۆ (54 كگ) پەن ەراسىل تاڭقاي (60 كگ) جارىس جولىنان شىعىپ قالعان. ال 71 كەلىگە دەيىنگى سالماقتاعى اسلانبەك شىمبەرگەنوۆ ءتۋرنيردىڭ باستالۋىنا 5 كۇن قالعاندا، ەسكى جاراقاتى سىر بەرۋىنە بايلانىستى جولعا شىعا الماعان.

وسىلاردان باسقا سالماقتارداعى ءتورت بوكسشىمىز شارشى الاڭعا شىعادى. ولاردىڭ دا ۇشەۋى وزبەكستاننان كەلگەن قارسىلاستارىمەن كۇش سىناسقالى تۇر. اتاپ ايتقاندا، ەرنۇر قايرات (48 كگ) گرۋزين لۋكا كۋبلاشۆيليمەن بەتتەسسە، تەمىرحان تەزەك (67 كگ)  بەكزود حاميدوۆپەن، بەكزات تاڭاتاروۆ (86 كگ) شوحجاحون ابدۋللاەۆپەن، ال قامشىبەك قوڭقاباەۆ (+92 كگ) باحودير جالولوۆپەن ۇستاسادى.

شيرەك فينالدىڭ قالعان سالماقتارداعى (51، 57، 63،5، 75، 80، 92) جەكپە-جەكتەرى 24 اقپاندا اياقتالادى. جارتىلاي فينالدىق ايقاستار 25 اقپاندا وتسە، فينالدىق باسەكەلەر 26 اقپان كۇنى بولادى.

داستان كەنجالين،

استانا