ءبىزدى تانىستىرعان دا تابىستىرعان دا — سپورت

جاقىندا مادەنيەت جانە سپورت مينيسترلىگىندە جاقسى ءبىر تاعايىنداۋ بولدى. بۇل تاعايىنداۋدى «Haluq uni» اقپاراتتىق اگەنتتىگىنىڭ جەلىلىك باسىلىمىنان وقىپ، قۋانىپ قالدىم. مادەنيەت جانە سپورت ءمينيسترىنىڭ جاڭا ورىنباسارى بولىپ بەلگىلى ازامات سارسەن قۇرانبەك كەلدى دەگەندى ەستىپ، ريزا بولدىم.

ساكەڭ ەكەۋمىز 2010 جىلدان بەرى تانىسپىز. سول كەزدە ول «قىسقى ازيا ويىندارى مەن وليمپيادا الاۋىنىڭ ەستافەتاسى جونىندەگى قالالىق ديرەكتسياسى» مكك ديرەكتورىنىڭ ورىنباسارى قىزمەتىن اتقارعاندا مەن «ەگەمەن قازاقستان» گازەتىنىڭ ءتىلشىسى بولعان ەدىم. ۇمىتپاسام، 2010 جىلدىڭ جاز ايىندا رەداكتسيانىڭ تاپسىرماسىمەن قىسقى ازيادانىڭ باستالۋىنا جارتى جىل قالعاندا العاش رەت ەلىمىزدە بولاتىن دۇرمەكتى دودا تۋرالى ماتەريالداردى شىعارا باستادىق. بۇل ءىس ماعان جۇكتەلدى. گازەت باسشىلىعى «وسى ازاماتپەن حابارلاس. تەلەفون نومەرى وسى. ءارى قاراي ءوزىڭ اكەتەسىڭ»، دەپ ساكەڭنىڭ كوورديناتىن بەرگەنى ەسىمدە.

سول كۇنى سارسەن اباي ۇلىمەن حابارلاسىپ، كەشكە قاراي ۋاقىت وزدىرماي، ماتەريال دايىنداۋعا باردىم. «قىسقى ازيا ويىندارى مەن وليمپيادا الاۋىنىڭ ەستافەتاسى جونىندەگى قالالىق ديرەكتسياسى» مكك-گە بارىپ، ساكەڭە جولىقتىم. مەكەمەگە بارسام، ورنالاسقان عيماراتى ەسكىلەۋ ەكەن. ساكەڭنىڭ بولمەسى دە اياداي بولىپ كورىندى. ەكەۋمىز اڭگىمەدەن اڭگىمە شىعىپ، ءبىراز ۋاقىت اڭگىمەلەستىك. ول مەنىڭ اكەمدى بىلەتىنىن ايتتى. بۇعان دەيىن الماتىدا ءبىراز مەكەمەدە قىزمەت ەتىپتى. سول قىزمەت بابىمەن جۇرگەندە اكەممەن تانىسىپ، جاقسى ارالاسقانىن جەتكىزدى.

سارسەن اباي ۇلىمەن سۇحباتتا سپورتقا قاتىستى عانا ەمەس، اتا-بابامىزدان تارام-تارام ۇرپاق ارقىلى ميراس بولىپ كەلە جاتقان ۇلتتىق سالت-ءداستۇرىمىز، ونەرىمىز بەن مادەنيەتىمىز، تاريحىمىز تۋرالى اڭگىمە قوزعاپ، ءوز ويلارىن ايتتى. سويتسەم، وعان تاڭقالاتىنداي ەشتەڭە جوق ەكەن. ساكەڭنىڭ تەكتى اۋلەتتەن شىققانىن سول كەزدە ءبىلدىم. ونىڭ تۋعان باۋىرى بەيسەن قۇرانبەك ەكەنىن بىلمەپپىن. بەيسەكەڭ اعامىز دا تەكتىلىگىن كورسەتىپ جۇرەتىن ەدى. مىنە، وسى كەزدەسۋدەن كەيىن ءبىز ساكەڭ ەكەۋمىز اعالى-ءىنىلى ارىپتەس بولىپ سىيلاسىپ كەتتىك.

ول قاي جەردە جۇرسە دە قاي قىزمەتتە بولسا دا ءوز ءىسىنىڭ مامانى ەكەنىن كورسەتىپ كەلەدى. وعان 2011 جىلى ەلىمىزدە تۇڭعىش رەت جالاۋى جەلبىرەگەن قىسقى ازيادانىڭ، قازاقتىڭ تاعى ءبىر اپتال ازاماتى ارمان شوراەۆتىڭ باستاماسىمەن قۇرىلعان «قازاقستان بارىسى» ءتۋرنيرى مەن باسقا دا جارىستاردىڭ لايىقتى دەڭگەيدە وتۋىنە اتسالىسقانىن دالەل رەتىندە ايتۋعا بولادى.

جالپى، ساكەڭ تۋرالى ايتار ءسوزىمىز كوپ. ءبىز، جۋرناليستەر قاۋىمى تامىرىن تەرەڭگە جىبەرگەن تەكتىلىگى بار، كورگەنى مەن تۇيگەنى بار، كىسىگە جاساعان قايىرىمى مەن كەڭدىگى بار وسىنداي سىمداي تارتىلعان، اقىلى مەن كەلبەتى كەلىسكەن قازاق جىگىتتەرىنىڭ مەملەكەتتىك قىزمەتكە بارعانىنا قۋانامىز! جۇمىسىڭىز جەمىستى، ءىسىڭىز بەرەكەلى بولسىن، ساكە!

داستان كەنجالين،

استانا