«استانا» — قازاقستان سۋپەركۋبوگىنىڭ يەگەرى

«استانا-ارەنا» ستاديونىندا «استانا» كلۋبى شىمكەنتتىڭ «ورداباسى» كومانداسىن 2:1 ەسەبىمەن ۇتىپ، قازاقستان سۋپەركۋبوگىن جەڭىپ الدى.

«استانا» بىلتىرعى فۋتبول ماۋسىمىندا ەلىمىزدىڭ چەمپيونى اتانسا، «ورداباسى» قازاقستان كۋبوگىنىڭ يەگەرى بولعان ەدى.

ءبىرىنشى تايمدا كوماندالار ماتچتاعى بارلىق گولدارىن سالىپ ۇلگەردى. اۋەلى 8-مينۋتتا الەكسا امانوۆيچ ەسەپ اشىپ، «استانانى» العا شىعاردى. ارادا ءبىر مينۋت وتەر-وتپەستە شىمكەنتتىكتەر تارازى باسىن تەڭەستىردى. ونى شۇعىل قارسى شابۋىل بارىسىندا ەركەبۇلان تۇڭعىشباەۆ باسپەن ۇرىپ ءتۇسىردى. ال 38-مينۋتتا «ورداباسى» قاقپاسىنا پەنالتي بەلگىلەندى. ونى دەمبو داربو جاقسى پايدالانا ءبىلدى.

ەسەپ وسىدان كەيىن كەزدەسۋ سوڭىنا دەيىن وزگەرگەن جوق.

بۇگىن سونداي-اق سانكت-پەتەربۋرگتىڭ «زەنيت» كلۋبى ۋليانوۆسكىدە جەرگىلىكتى «ۆولگامەن» رەسەي كۋبوگىنىڭ 1/32 فينالدىق ويىنىن وتكىزىپ، 3:0 ەسەبىمەن جەڭىسكە جەتتى. ماتچقا جەڭىمپازدار ساپىندا قازاقستاندىق نۇرالى ءالىپ باستان-اياق قاتىستى.

وسى كۇنى سول سياقتى تاشكەنتتە «پاحتاكور» مەن الماتىنىڭ «قايراتى» جولداستىق كەزدەسۋ وتكىزدى. ماتچ 4:3 (2:1) ەسەبىمەن الاڭ يەلەرىنىڭ پايداسىنا شەشىلدى.

داستان كەنجالين،