«Astana» — Qazaqstan Sýperkýbogynyń ıegeri

«Astana-Arena» stadıonynda «Astana» klýby Shymkenttiń «Ordabasy» komandasyn 2:1 esebimen utyp, Qazaqstan Sýperkýbogyn jeńip aldy.

«Astana» byltyrǵy fýtbol maýsymynda elimizdiń chempıony atansa, «Ordabasy» Qazaqstan Kýbogynyń ıegeri bolǵan edi.

Birinshi taımda komandalar matchtaǵy barlyq goldaryn salyp úlgerdi. Áýeli 8-mınýtta Aleksa Amanovıch esep ashyp, «Astanany» alǵa shyǵardy. Arada bir mınýt óter-ótpeste shymkenttikter tarazy basyn teńestirdi. Ony shuǵyl qarsy shabýyl barysynda Erkebulan Tuńǵyshbaev baspen uryp túsirdi. Al 38-mınýtta «Ordabasy» qaqpasyna penaltı belgilendi. Ony Dembo Darbo jaqsy paıdalana bildi.

Esep osydan keıin kezdesý sońyna deıin ózgergen joq.

Búgin sondaı-aq Sankt-Peterbýrgtiń «Zenıt» klýby Ýlıanovskide jergilikti «Volgamen» Reseı Kýbogynyń 1/32 fınaldyq oıynyn ótkizip, 3:0 esebimen jeńiske jetti. Matchqa jeńimpazdar sapynda qazaqstandyq Nuraly Álip bastan-aıaq qatysty.

Osy kúni sol sııaqty Tashkentte «Pahtakor» men Almatynyń «Qaıraty» joldastyq kezdesý ótkizdi. Match 4:3 (2:1) esebimen alań ıeleriniń paıdasyna sheshildi.

Dastan KENJALIN,