رەسەيدە ءىى «ازيا بالالارى» ويىندارى باستالدى (فوتو)

بۇگىن رەسەي فەدەراتسياسىنىڭ كەمەرەۆو قالاسىندا قىسقى سپورت تۇرلەرىنەن ءىى «ازيا بالالارى» ويىندارى باستالدى. بۇل تۋرالى مادەنيەت جانە سپورت مينيسترلىگىنىڭ سپورتتى دامىتۋ ديرەكتسياسى حابارلادى.

اۋەلى «كۋزباسس» مۇز سارايىنداعى ۇلتتىق قۇرامالار شەرۋىندە ەلىمىزدىڭ تۋىن شورت-ترەكشى سانجار بەكەجان ۇستاپ شىقتى. الداعى كۇندەرى قازاقستان وسى حالىقارالىق جارىستا 6 سپورت تۇرىنەن سىنعا تۇسەتىن 64 اتلەتتىڭ جولىنا ۇمىتپەن قارايدى.

العاش رەت حالىقارالىق جارىسقا كەلگەن قازاقستان قۇراماسىنىڭ كاپيتانى سانجار بەكەجان: «تۋدى ۇستاپ شىققانىما قۋانىپ تۇرمىن. بۇل مەن ءۇشىن موتيۆاتسيا. ەندى جارىس كەزىندە جۇلدە الۋعا، قاسىمداعى جورا-جولداستارىما ۇلگى بولۋعا تىرىسامىن. ءبىرىنشى حالىقارالىق جارىس بولعاندىقتان قوبالجىپ ءجۇرمىز. الايدا دايىندىعىمىز جاقسى»، — دەدى.

شەرۋدەن سوڭ «ازيا بالالارى» ويىندارىنىڭ تۋىن العاش رەت تانىمال سپورتشىلار ورتاعا الىپ شىقتى. ولاردىڭ ءبارى كەزىندە وسى ويىندارعا قاتىسىپ، كاسىبي كارەراسىن باستاعان تانىمال اتلەتتەر. تۋ ۇستاۋشى 6 ادامنىڭ قاتارىنا ەلىمىزدەن بوكستان الەم جانە ازيا چەمپيونى مەملەكەتتىك جاتتىقتىرۋشى مەرەي اقشالوۆ شاقىرتۋ الدى.

مەن دە ۇلكەن سپورتتاعى العاشقى قادامىمدى 2004 جىلى ياكۋتسك قالاسىنداعى جازعى «ازيا بالالارى» ويىندارىندا جاساعانمىن. ارادا 19 جىل ءوتىپتى. قازىر تريبۋنادا وتىرعان جاس سپورتشىلاردىڭ قانداي كۇيدە وتىرعانىن جاقسى تۇسىنەمىن. بۇل ولار ءۇشىن تاجىريبە جينايتىن، شىڭدايتىن جاقسى الاڭ بولادى. مەنەن باسقا تۋ ۇستاعان 5 سپورتشى دا رەسەيلىك ەكەن. وسىلاي ەلەپ شاقىرعاندارى ءۇشىن راقمەت. ۇلتتىق قۇرامامىز ءساتتى ونەر كورسەتەدى، دەگەن سەنىمدەمىن، — دەدى مەرەي اقشالوۆ راسىمنەن كەيىنگى سۇحباتىندا.

وسىدان كەيىن ويىندار تاريحىنان سىر شەرتەتىن ءتۇرلى قويىلىمدار مەن كونتسەرت بولدى. بۇل قاتاردا مانەرلەپ سىرعاناۋدان ەكى دۇركىن وليمپيادا چەمپيونى ەۆگەني پليۋششەنكو، جاس سپورتشى الەكساندر پليۋششەنكو مەن وليمپيالىق ويىندارىنىڭ جۇلدەگەرى الەكساندرا ترۋسوۆانىڭ ارنايى شوۋىن اتاپ وتۋگە بولادى.

جالپى، سالتاناتتى اشىلۋدى ارەنادان 5 مىڭعا جۋىق جانكۇيەر تاماشالادى. بۇگىننەن باستاپ كەي سپورتتاعى جۇلدەگەرلەر انىقتالىپ جاتىر. ال قازاقستاندىقتار جۇلدە جولىنداعى تالاسقا 27 اقپاننان باستاپ ارالاسادى (شورت-ترەك).

«ازيا بالالارى» ويىندارى 4 ناۋرىزدا اياقتالادى. وعان دەيىن بارلىعى 57 مەدال جيىنتىعى ساراپقا سالىنادى. وعان قازاقستان، ارمەنيا، اۋعانستان، بەلارۋس، كۋۆەيت، قىرعىزستان، ليۆان، نەپال، تاجىكستان، تايلاند، تۇرىكمەنستان، وزبەكستان، رەسەيدىڭ ماسكەۋ قالاسى، كۋزباسس ءوڭىرىنىڭ قۇراماسى، قيىر شىعىس فەدەرالدى وكرۋگى، ءسىبىر فەدەرالدى وكرۋگى، ورال فەدەرالدى وكرۋگىنىڭ قۇراماسى، باشقۇرتستان رەسپۋبليكاسى، ساحا رەسپۋبليكاسى مەن تاتارستان رەسپۋبليكاسى قۇراماسى.

قازاقستان العاش رەت 2019 جىلى وتكەن «ازيا بالالارى» ويىندارىنا جارىستىڭ 8 تۇرىنەن 74 سپورتشى اپارعان. جالپى ەسەپتە 7 التىن، 7 كۇمىس جانە 6 قولا مەدالمەن 6-ورىننان كورىنگەن. 2019 جىلى بارلىعى 11 كوماندا قاتىسقان. بيىلعى ويىندارعا 12 كوماندا باردى.

داستان كەنجالين،

استانا