Rybakına jeńisi úshin 1 mln dollardan astam júlde aldy (VIDEO)

Qazaqstannyń birinshi raketkasy Elena Rybakına Indıan-Ýells WTA 1000 týrnıriniń jeńimpazy atanǵan soń, 1 mln dollar júlde jeńip aldy.

Ol fınalda álemniń ekinshi raketkasy, Belarýs ókili Arına Sobolenkomen kezdesip, eki saǵattan astam ýaqytqa sozylǵan synda qarsylasyn 7:6 (13:11), 6:4 esebimen utty.

Sóıtip, alǵash ret WTA 1000 jarysynyń jeńimpazy atanǵan Elena Rybakına Arına Sobolenkodan Avstralııa ashyq chempıonatynyń fınalynda ketken eseni qaıtardy.

Men ǵajap áser aldym. Bul eki apta bir jaǵynan qıyn boldy. Ekinshi jaǵynan alyp qaraǵanda, men úshin sátti ótti. Fınalda birinshi sette ekeýmizde de múmkindikter boldy. Aqyrynda tarazy basy maǵan aýdy. Birinshi setten keıin kishkene jeńildedi dep oılaımyn. Taı-breık qateliktermen de este qaldy. Júıkege de salmaq tústi. Ár upaı úshin aıaǵyna deıin kúresýge týra keldi. Bizdi qoldaǵandardyń bárine úlken alǵysymdy aıtqym keledi. Arınany da tamasha ónerimen quttyqtaımyn! Mundaı fınaldarda áli de oınaımyz. Men kelesi jyly da kelip, óz jetistigimdi qaıtalaýǵa daıynmyn, — dedi Elena.

Ol týrnırdi uıymdastyrýshylarǵa, demeýshilerge, dırektorlarǵa, eń bastysy, óz komandasyna rızashylyǵyn bildirdi.

Dastan KENJALIN,

ASTANA