ءومىر قيمىل-قوزعالىس جانە ارەكەتتەن تۇرادى

ءومىر ءوزى قيمىل، قوزعالىس، ارەكەتتەن تۇرادى ەمەس پە؟! ەگەر وسى ءبىر ادامعا بەرىلەر ءۇش قاسيەت توقتاسا ءومىر دە توقتايدى. بەسكۇندىك بۇل جالعاندا ادام ومىرگە قوناق. سوندىقتان دا قامشىنىڭ سابىنداي قىسقا عۇمىرىمىزدى ءماندى، ماعىنالى ەتىپ وتكىزگەنگە نە جەتسىن. دەنساۋلىقتىڭ قادىرىن ءبىز تەك ءبىر جەرىمىز سىرقىراپ اۋىرعاندا عانا بىلەمىز.

يبن سينا: «اۋىرىپ تۇرىپ ەم ىزدەگەنشە، اۋىرماۋدىڭ جولىن ىزدە»، — دەگەن ەكەن. ەندەشە اۋىرماۋدىڭ ەڭ ءبىر ءتيىمدى جولى سالاماتتى ءومىر سالتىن قالىپتاستىرىپ، سپورتپەن اينالىسۋ وتە ماڭىزدى. باۋىرجان مومىش ۇلى: «بويىمدا قاجىر قايرات، كۇش-جىگەرىم باردا، مەنى كارىلەردىڭ تىزىمىنە قوسپاڭدار»، -دەگەن ەكەن. ولاي بولسا «مەن شارشادىم، قاجىدىم»، — دەگەن ادامدى كەرى قاراي سۇيرەيتىن سۇرەڭسىز سوزدەردەن اۋلاق بولعان ابزال. ويتكەنى، ءومىر ءبىر-اق رەت بەرىلەتىنىنىن ءبىر ءسات ەستەن شىعارماعان ءجون.

حوش، سالاماتتى ءومىر سالتىن دامىتۋدا وتكىزىلىپ تۇراتىن سپورتتىق ءىس-شارالاردان ءوز باسىم قالىپ قالماۋعا تىرىسامىن. ءبىر جاعىنان سپورت دەنساۋلىق كەپىلى بولسا، ەكىنشى جاعىنان دوس-جاراندارمەن جولىعىسىپ، كوڭىل حوشىن جاراستىرىپ قايتاسىڭ. مىنە، سونداي ءبىر يگىلىكتى سپورتتىق ءىس-شارانىڭ ءبىرى كەشە وتەگەن كەنتىندە بولىپ ءوتتى.

شاعىن فۋتبولدان ناۋرىز مەرەكەسىنە ارنالعان بۇل ءتۋرنيردى ەلگە بەلگىلى قالامگەر اعامىز ءالىم اناپيانوۆ ۇيىمداستىرعان ەكەن. جارىس ارداگەرلەر اراسىندا بولدى. تۋرنيرگە 5 كوماندا قاتىستى. ءتىپتى، تالعار قالاسىنىڭ ارداگەرلەر قۇراماسى دا ءبىر كومانداسىن سايلاپ اكەلىپ باقتارىن سىنادى.تارتىستى وتكەن كەزدەسۋدە ءبىرىنشى ورىندى وتەگەن كەنتىنىڭ ارداگەرلەر قۇراماسى جەڭىپ الدى. ال، جۇلدەلى ەكىنشى ورىندى مەنىڭ «قالامگەر» كوماندام يەلەندى.

جارىس سوڭىندا ۇزدىك شابۋىلشى، ۇزدىك قورعاۋشى جانە ۇزدىك قاقپاشىلار جارىس ۇيىمداستىرۋشى ءالىم اناپيانوۆتىڭ قولىنان باعالى سىيلىقتارىن الىپ مارە-سارە بولىپ جاتتى. ارداگەلەر فۋتبول الاڭىندا ەستەلىككە سۋرەتكە ءتۇسىپ، كوپكە دەيىن تارقاماي العان اسەرلەرىن ايتىپ ءجۇردى. نەگىزى وسىنداي ارداگەرلەر ءتۋرنيرى جاستارى الدى 50-دەن اسىپ ارتى 70-كە تاقاعان ءالى دە دوداعا تۇسەر قۋات كۇشى بار ارداگەرلەر ءۇشىن وتە ماڭىزدى. ارينە، بايگەلى بولىپ قانجىعا مايلانىپ قايتقانى قۋانارلىق ءجاي. دەگەنمەندە ارداگەرلەر وزدەرىن وسىنداي جارىستاردى تۇلپارداي سەزىنىپ قالاتىنى انىق. ءبىر جاعىنان قۇرمەت، ماقتانىش بولسا، ءبىر جاعىنان تاپتىرماس دەنساۋلىق، ەسكى تانىس جورا-جولداستارىن جولىقتىرىپ سىرلاسىپ، شۇرقىراسىپ قايتۋ دەپ بىلەمىن. ەندەشە، وسىنداي ارداگەرلەرگە ارنالار يگى سپورتتىق ءىس-شارالاردىڭ عۇمىرى ۇزاق بولسىن دەپ تىلەر ەدىم. ايتپاقشى، وسى ناۋرىزعا وراي ۇيىمداستىرىلعان جارىس داستۇرلىك بولاتىن بولدى. اللا الدىنان جارىلقاسىن دەيمىن!

اقىن ورداباي ۇلى،

الماتى