SportPress.kz Qazaqstan sport jańalyqtary
О́mir ózi qımyl, qozǵalys, áreketten turady emes pe?! Eger osy bir adamǵa beriler úsh qasıet toqtasa ómir de toqtaıdy. Beskúndik bul jalǵanda adam ómirge qonaq. Sondyqtan da qamshynyń sabyndaı qysqa ǵumyrymyzdy mándi, maǵynaly etip ótkizgenge ne jetsin. Densaýlyqtyń qadirin biz tek bir jerimiz syrqyrap aýyrǵanda ǵana bilemiz.
Ibn Sına: «Aýyryp turyp em izdegenshe, aýyrmaýdyń jolyn izde», — degen eken. Endeshe aýyrmaýdyń eń bir tıimdi joly salamatty ómir saltyn qalyptastyryp, sportpen aınalysý óte mańyzdy. Baýyrjan Momyshuly: «Boıymda qajyr qaırat, kúsh-jigerim barda, meni kárilerdiń tizimine qospańdar», -degen eken. Olaı bolsa «men sharshadym, qajydym», — degen adamdy keri qaraı súıreıtin súreńsiz sózderden aýlaq bolǵan abzal. О́ıtkeni, ómir bir-aq ret beriletininin bir sát esten shyǵarmaǵan jón.
Hosh, salamatty ómir saltyn damytýda ótkizilip turatyn sporttyq is-sharalardan óz basym qalyp qalmaýǵa tyrysamyn. Bir jaǵynan sport densaýlyq kepili bolsa, ekinshi jaǵynan dos-jarandarmen jolyǵysyp, kóńil hoshyn jarastyryp qaıtasyń. Mine, sondaı bir ıgilikti sporttyq is-sharanyń biri keshe О́tegen kentinde bolyp ótti.
Shaǵyn fýtboldan Naýryz merekesine arnalǵan bul týrnırdi elge belgili qalamger aǵamyz Álim Anapııanov uıymdastyrǵan eken. Jarys ardagerler arasynda boldy. Týrnırge 5 komanda qatysty. Tipti, Talǵar qalasynyń ardagerler quramasy da bir komandasyn saılap ákelip baqtaryn synady.Tartysty ótken kezdesýde birinshi oryndy О́tegen kentiniń ardagerler quramasy jeńip aldy. Al, júldeli ekinshi oryndy meniń «Qalamger» komandam ıelendi.
Jarys sońynda úzdik shabýylshy, úzdik qorǵaýshy jáne úzdik qaqpashylar jarys uıymdastyrýshy Álim Anapııanovtyń qolynan baǵaly syılyqtaryn alyp máre-sáre bolyp jatty. Ardageler fýtbol alańynda estelikke sýretke túsip, kópke deıin tarqamaı alǵan áserlerin aıtyp júrdi. Negizi osyndaı ardagerler týrnıri jastary aldy 50-den asyp arty 70-ke taqaǵan áli de dodaǵa túser qýat kúshi bar ardagerler úshin óte mańyzdy. Árıne, báıgeli bolyp qanjyǵa maılanyp qaıtqany qýanarlyq jáı. Degenmende ardagerler ózderin osyndaı jarystardy tulpardaı sezinip qalatyny anyq. Bir jaǵynan qurmet, maqtanysh bolsa, bir jaǵynan taptyrmas densaýlyq, eski tanys jora-joldastaryn jolyqtyryp syrlasyp, shurqyrasyp qaıtý dep bilemin. Endeshe, osyndaı ardagerlerge arnalar ıgi sporttyq is-sharalardyń ǵumyry uzaq bolsyn dep tiler edim. Aıtpaqshy, osy Naýryzǵa oraı uıymdastyrylǵan jarys dástúrlik bolatyn boldy. Alla aldynan jarylqasyn deımin!
Aqyn ORDABAIULY,
ALMATY
