الماتىدا ارىپتەستەرىمىز امانگەلدى سەيىتحانوۆتى ەسكە الدى (فوتو)

الماتىدا وسىمەن ەكىنشى رەت بەلگىلى سپورت كوممەنتاتورى، اقىن، ءسوز زەرگەرى امانگەلدى سەيىتحانوۆتى ەسكە الۋعا ارنالعان شاعىن فۋتبولدان رەسپۋبيكالىق تۋرنير بولىپ ءوتتى.

بىزدە بىلتىرعى وتكەن جارىستاعىداي ءبىر كوماندا سايلاپ اپارىپ الامان جۋرناليستەر جارىسىنا قوسىلعان ەدىك. «سپورت جۋرناليستەرى» دەگەن اتپەن سىنعا شىققان مەنىڭ كوماندام تاماشا ويىن ورنەگىن كورسەتىپ، جارىس باستالعاننان باستاپ كورەرمەندى وزىنە بىردەن باۋراپ الدى. كوماندامىزدىڭ قۇرىلۋىنا ۇيىتقى بولىپ شاپقىلاپ، جاس تا بولسا باس بولىپ جۇرگەن اسقار حاميدينوۆ پەن ءازيز ءجۇمادىل باۋىرلارىما ايتار العىسىم شەكسىز. استانادان جولىن تاۋىپ «ايبارس» اتتى دەمەۋشىنى تاۋىپ بارلىعىمىزعا سپورت كيىمدەرىن الىپ كەلگەن ەكەن. ۇستىمىزگە سۋ جاڭا فۋتبول فورماسىن كيگەننەن كەيىن، كوماندا ويىنشىلارىندا وزگەشە رۋح پايدا بولىپ جەڭىسكە دەگەن جىگەرى ارتا ءتۇستى.

كۇن كوتەرىلىپ قىزۋى دەنەگە وتە باستاعان كەزدە جارىستىڭ ويىندارى توقتالىپ اشىلۋ سالتاناتىنا جول بەردى.

ءتۋرنيردىڭ اشىلۋىنا قاتىسقان قازاقتىڭ سپورت جانە تۋريزيم اكادەمياسىنىڭ رەكتورى قايرات زاكيريانوۆ، «حابار» تەلەارناسىنىڭ ديرەكتورى بەرىك ءۋالي، اتى اڭىز ويىنشى سەيىلدا بايشاقوۆ، تانىمال بىلعارى قولعاپ شەبەرى قانات يسلام، بەلگىلى سپورت قالامگەرى نەسىپ ءجۇنىسباي ۇلى جانە امانگەلدى سەيىتحانوۆتىڭ ەت جاقىن تۋىستارى امانگەلدىنىڭ ونەگەلى ومىرىنەن ءسوز قوزعاپ، قاتىسۋشىلارعا جەڭىستى ويىندار تىلەدى. «شاكىرتسىز ۇستاز تۇل» دەگەن بابالارىمىز، ءوزىنىڭ ارتىن ءىزباسار شاكىرت قالدىرۋ ۇستاز ءۇشىن ۇلكەن ماقتانىش. امان ومىردەن وتسە دە ارتىنا ىزدەۋشىسى بار ايتارى كوپ، جازارى جاراسىمدى شاكىرت تاربيەلەپ كەتكەن جان. ولاردىڭ اراسىندا جاندوس ايتباي ۇلىن ايتسا بولادى. ۇستازىنىڭ اتىن وشىرمەۋ شاكىرتكە ۇلكەن سىن. سوندىقتاندا جاندوس ۇستازىنىڭ اتىنداعى جارىستىڭ ويداعىداي اتقارىلىپ وتۋىنە بارىن سالىپ شاپقىلاپ، جارعاق قۇلاعى جاستىققا تيمەي زور ۇلەسىن قوسىپ جۇرگەن ازامات ەكەنىن ايتا كەتكەنىمىز ورىندى بولار.

جارىستىڭ سالتاناتتى اشىلۋى اياقتالا سالىپ قاتارلاس جاتقان قوس الاڭدا تارتىستى كەزدەسۋلەر جالعاستى. ىنتىماعى جاراسىپ، بىرلىگى ۇيىسقان ءبىزدىڭ كوماندامىز دا شەبەرلىگى جاعىنان دا قۇر قول ەمەس ەكەندىكتەرىن ويىن بارىسىندا تاماشا كورسەتە ءبىلدى. الدىمەن «31 تەلەارنا» كومانداسىن 1:0 ەسەبىمەن، سوسىن «تۇركىستان» كومانداسىن ءدال وسىنداي ەسەپپەن ۇتىپ، جەڭىستى جولىمىزدى جالعاستىردىق. سوڭعى ويىندى تەڭ ويناپ 1/8 فينالىنا توبىزدان ءبىرىنشى ورىنمەن شىقتىق. ءسويتىپ، قىزىلوردادان كەلگەن «اقمەشىت» كومانداسىمەن نەگىزگى ويىندا ۋاقىتىندا تەڭ ءتۇسىپ، پەنالتيدەن سىر وڭىرىنەن كەلگەن قوناقتارعا جول بەردىك.

ءيا، پەنالتي دەگەن ول ءبىر لوتورەيا. كىمنىڭ جولى بولسا سول ۇستەم بولارى بەلگىلى. سونشاما جەردەن ات تەرلەتىپ جەتكەن قىزىلوردالىقتارعا جاراتۋشى يەمىز دە مەيىرىممەن قاراسا كەرەك، بۇل كوماندا فينالدا دا «قازمەديا» كومانداسىن پەنالتيدەن ۇتىپ كەتتى. ال، ءبىزدىڭ كوماندا ءۇشىنشى ورىن ءۇشىن «اتىراۋ» كومانداسىمەن الاڭعا شىققان ەدى. كەسكىلەسكەن كەزدەسۋ وڭايعا تۇسپەدى. كۇن ۇزاق ابدەن قالجىراپ شارشاعان ويىنشىلارىمىز جەڭىستى ج ۇلىپ الۋعا شارا جەتپەدى. ەسەپ 3:1 بولىپ سىر وڭىرىنەن كەلگەن جىگىتتەردىڭ جەڭىسىمەن اياقتالدى.

حوش، قالاي دەسەك تە، كىللى 30-دان اسىپ، وردا بۇزعان قالامگەرلەردەن قۇرالعان ءبىزدىڭ «سپورت جۋرناليستەرى» كومانداسى امان دوسىمنىڭ رۋحىنا ارنالعان رەسپۋبليكالىق جارىستا 16 كوماندانىڭ ىشىنەن ويىپ تۇرىپ ءتورتىنشى ورىنعا يە بولدى. ءيا، جۇلدەگە سۇيەم جەر قالعاندا سۇرىندىك. دەگەنمەن حالىقتىڭ ىستىق ىقىلاسىنا بولەنۋدىڭ ءوزى ۇلكەن ماقتانىش دەپ بىلەمىن. كوماندا جىگىتتەرى جان اياماي جەڭىس ءۇشىن بارىن سالدى. نەگىزى، بيىلعى جارىستى ۇيىمداستىرۋدى ءوز قامقورلىعىنا العان «حابار» تەلاراناسى مەن ونىڭ باسشىسى بەرىك ءۋاليدىڭ ءتۋرنيردى وتكىزۋگە اسقان جاۋاپەرشىلىكپەن قاراعاندىعى كورىنىپ تۇردى.

بەرىك ۋاليمەن ەرتەرەكتە سپورت جۋرناليستيكاسىنىڭ اقتاڭگەر اتاسى سەيداحمەت بەردىقۇلوۆتىڭ اتىندا وتەتىن ءداستۇرلى رەسپۋبليكالىق ءتۋينيردىڭ الاڭىندا ءجيى كەزدەسىپ، تالاي رەت تەڭبىل دوپتى بىرگە تەپكەن ەدىك. بەرىك سول جىلدارى قالامگەرلەر اراسىندا فۋتبولدى شەبەر وينايتىن ويىنشىنىڭ ءبىر ەدى. «سىرلى اياقتىڭ سىرى كەتسە دە سىنى كەتپەيدى»، دەمەكشى، ارادا جىلدار زۋلاپ وتسە دە بويدا قالىپتاسىپ قالعان شەبەرلىگى ءالى سول ساقتالىپ قالعاندىعىنىڭ كۋاسى بولدىم. ارىپتەسىمنىڭ ەلگە ءمالىم ۇلكەن تەلەارنا ۇجىمنىڭ باسشىسى بولا تۇرىپ، تەڭبىل دوپتى ۇرشىقشا ءيىرىپ الىپ، شەبەر وينايتىن ويىنشى ەكەنىن تاماشا سوققان گولدارىمەن كورسەتە ءبىلدى. وسىلايشا، بەرىك ءۋاليدىڭ جارىستى ۇيىمداستىرىپ قانا قويماي، جاسىل الاڭدا بەلسەنە ارىپتەستەرىمەن جان اياماي يىق قاعىسىپ كورسەتكەن ونەرىنە ءتانتى بولدىق. وسىلايشا، ارىپتەسىمىزدىڭ امانگەلدى سەيىتحانوۆ مارقۇمعا دەگەن زور قۇرمەتىنىڭ ارقاسىندا تۋرنير جوعارى دەڭگەيدى ءوتىپ، قاتىسۋشىلاردىڭ بارلىعى جۇلدەسىز ۇيىنە قايتپادى.

ۇزدىك ويىنشىلار نوميناتسياسىندا ءبىزدىڭ «سپورت جۋرناليستەرى» كومانداسىنىڭ قاقپاشىسى دا ماراپاتقا يە بولىپ، ءتۋرنيردىڭ ۇزدىك قاقپاشىسى اتاعىنا يە بولدى. سونداي-اق، ءبىزدىڭ كومانداعا 100 مىڭ تەڭگە سىياقى بەرىلدى. بۇرىن-سوڭدى ءتورتىنشى ورىنعا قارجى كولەمى بەرىلىپ كورمەگەندىكتەن ۇيىمداستىرۋشىلار القاسىنا، كوماندامىزدى ەلەپ ەسكەرىپ بەرگەن وسىنداي قارجىلاي قۇرمەتىنە زور العىسىمىزدى جەتكىزدىك. سونىمەن 500 مىڭ تەڭگە مەن باس كۋبوكتى سىر وڭىرىنەن كەلگەن «اقمەشىت» كومانداسى جەڭىپ السا، جۇلدەلى ەكىنشى ورىندى العان «قازمەديا» كومانداسىنا 300 مىڭ تەڭگە سىياقى بەرىلدى. ءتۋرنيردىڭ قولا جۇلدەسى 200 مىڭ تەڭگەدەي سىياقا العان «اتىراۋ-اقپارات» كومانداسى ماراپاتتالدى.

جارىس سوڭىندا بارشا قاتىسۋشىلار ەستەلىككە سۋرەتكە ءبىرىن-ءبىرى تارتىپ قيماي قوشتاسىپ كەتىپ جاتتى. «ءولى رازى بولماي ءتىرى بايىمايدى»،  دەيدى بابامىز. قازاق سپورت جۋرناليستكاسىندا وزىنشە ءىز قالدىرعان بەلگىلى سپورت كوممەنتاتورى، جەزتاڭداي اقىن،ءسوز زەرگەرى ارداقتى دوسىمىز امانگەلدى سەيىتحانوۆتى ەسكە الۋعا ارنالعان ءداستۇرلى تۋرنير وسىلاي ءوز مارەسىنە جەتتى. اللا اماندىعىن بەرسە الداعى جىلى دا بۇل جارىس جالعاسىن تابار دەگەن سەنىمدەمىن!

 

اقىن ورداباي ۇلى،

الماتى