كوركەم گيمناستيكا: سپارتاكيادادا شىمكەنت سپورتشىلارى جەڭىسكە جەتتى

بۇگىن استانا قالاسىنداعى Qazaqstan جەڭىل اتلەتيكا كەشەنىندە كوركەم گيمناستيكادان قازاقستاننىڭ VI جازعى سپارتاكياداسى اياقتالدى. بۇل جولى جەكەلەي سىندا ەلىمىزدىڭ ءار وڭىرىنەن كەلگەن 54 گيمناست سىنعا ءتۇستى. ال توپتىق جاتتىعۋدا 12 كوماندا باق سىنادى. بۇل قاتاردا ەلجاڭا تانيەۆا، ەريكا جايلاۋوۆا، ميلانا پارفيلوۆا سىندى حالىقارالىق باسەكەلەردە ەل نامىسىن قورعاپ جۇرگەن ۇلتتىق قۇراما وكىلدەرى بار.

شىعىرشىقپەن ونەر كورسەتۋدە ۇلتتىق قۇراما كوشباسشىلارى ەشكىمگە دەس بەرگەن جوق. باس جۇلدەنى ەلجاڭا تانيەۆا السا، ميلانا پارفيلوۆا كۇمىس، ايبوتا ەرتايقىزى قولا مەدالگە يە بولدى.

ەلجاڭا تانيەۆا دوپپەن جاتتىعۋدا دا چەمپيون اتانسا، ايبوتا ەرتايقىزى ەكىنشى، ەلوردالىق ەريكا جايلاۋوۆا 3-ورىن الدى.

ۇرشىق پەن لەنتا جاتتىعۋىندا ەلجانا تانيەۆا ۇزدىك اتاندى. كۇمىس جۇلدە ميلانا پارفيلوۆانىڭ، قولا ەريكا جايلاۋوۆانىڭ ەنشىسىندە. كوپسايىستا، ياعني 4 قۇرالمەن ونەر كورسەتۋدە ءار باعدارلامادا تۇراقتى ناتيدجە كورسەتكەن ەريكا جايلاۋوۆا التىننان القا تاقسا (115،450 بالل)، شىمكەنتتىك ميلانا پارفيلوۆا (111،700 بالل) مەن بايان قويباقار (102،950 بالل) تۇعىر بيىگىنىڭ قالعان ساتىسىنا كوتەرىلدى. بۇل سايىستا فينالعا ىرىكتەلىپ 15 گيمناست جولداما العان.

ال توپتار اراسىنداعى جانە كوماندالىق كوپسايىستا بىردەي ناتيجە تىركەلدى. ەكى سىندا دا شىمكەنت قالاسى مىقتى ەكەنىن تاعى ءبىر مارتە دالەلدەسە، ودان كەيىنگى ورىنعا استانا مەن الماتى قالاسىنىڭ ۇجىمى جايعاستى.

كەشە وتكەن كوركەم گيمناستار سايىسىنىڭ اشىلۋىنا سپورتتى دامىتۋ ديرەكتسياسى ديرەكتورىنىڭ ورىنباسارى، VI جازعى سپارتاكيادانىڭ باس تورەشىسى ازامات يماشەۆ، استانا قالاسى دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ، فەدەراتسيانىڭ باس حاتشىسى قاتىسىپ، ءسوز سويلەدى.

بۇل ەلدەگى بارلىق كوركەم گيمناست ءۇشىن جاۋاپتى جارىس. جۋىردا پورتۋگالياداعى الەم كۋبوگى كەزەڭىندە ءساتتى ونەر كورسەتكەن ۇلتتىق قۇراما سپورتشىلارى دا وسىندا سىنعا تۇسەدى. سوسىن، فيليپپيندە وتەتىن ازيا چەمپيوناتىنا دايىندىقتى باستايدى. ال كۇزدە جىلدىڭ باستى باسەكەسى — ازيا ويىندارى بار. سول سىندا گيمناستارعا زور سەنىم ارتامىز،- دەدى ازامات يماشەۆ.

جالپى ەسەپتە شىمكەنت قالاسىنىڭ گيمناستارى 7 التىن، 5 كۇمىس پەن 1 قولا مەدال جەڭىپ الىپ، ءبىرىنشى ورىنعا شىقتى. استانا قالاسى (1 التىن، 3 كۇمىس، 4 قولا) كۇمىس، الماتى قالاسى (1 التىن، 1 كۇمىس، 2 قولا) قولا جۇلدەگەر اتاندى.

شامكەن بايىربەك،

استانا