SportPress.kz قازاقستان سپورت جاڭالىقتارى
اقتاۋدا ءحىى جازعى ۋنيۆەرسيادا ويىندارى باستالدى. وسىعان وراي وقۋ-اعارتۋ مينيسترلىگى سپورتتىق ءىس-شارالار، ستاتيستيكا جانە تالداۋ باسقارماسىنىڭ باسشىسى ميرا مۇحاماديەۆاعا حابارلاسىپ سۇحبات الدىق.
– ميرا بەكقازىقىزى، ماڭعىستاۋ وبلىسىنا قوش كەلدىڭىز!
بۇگىن باستالعان اقتاۋ ۋنيۆەرسياداسىندا جەڭىسكە جەتكەن سپورتشىلار قىتايدىڭ چەندۋ قالاسىندا وتەتىن بۇكىلالەمدىك جازعى ۋنيۆەرسيادا ويىندارىنا قاتىسا الا ما؟
– ءيا، ەسەنوۆ ۋنيۆەرسيتەتى ۇيىمداستىرىپ جاتقان وسى ءحىى جازعى ۋنيۆەرسيادا ويىندارىندا ءبىرىنشى ورىن العان سپورتشىلار 28 شىلدە مەن 8 تامىز ارالىعىندا قىتايدىڭ چەندۋ قالاسىنا وتەتىن دۇنيەجۇزىلىك ۋنيۆەرسياداعا جولداما الادى. چەندۋ قالاسىنا باراتىندار جەڭىل اتلەتيكا، تاەكۆوندو، ۇستەل تەننيسى، ءجۇزۋ جانە دزيۋدو سياقتى سپورت تۇرلەرى بويىنشا ىرىكتەلەدى. بيىلعى ۋنيۆەرسيادانىڭ ءبىر ەرەكشەلىگى وليمپيادا سياقتى بارلىق ويىندار ءبىر-اق قالادا وتەدى. ءبىر قالادا 20 سپورتتىق ويىن تۇرىنەن ءبىر اي بويى وتەدى جانە وسى سايىستاردا سپورتشىلار تۇركى ۋنيۆەرسياداسى مەن بۇكىلالەمدىك ۋنيۆەرسياداعا ىرىكتەلەدى.
– جازعى ۋنيۆەرسيادادا جەڭىسكە جەتكەن جەڭىمپازدار مەن جۇلدەگەرلەردى قالاي ماراپاتتايسىزدار؟ قارجىلاي ما الدە «سپورت شەبەرى» اتاعى بەرىلە مە؟
– جەڭىمپازدارعا مەدال، ديپلوم بەرىلەدى جانە كوماندالىق ەسەپتە ورىن العاندار كۋبوكپەن، ديپلوممەن ماراپاتتالادى. سونداي-اق ءبىرىنشى ورىنعا يە بولعان ستۋدەنتتەر بۇكىلالەمدىك جازعى ۋنيۆەرسياداعا جولداما الادى.
– كەلەسى ۋنيۆەرسيادا قايدا ءوتۋى مۇمكىن؟
– الماتى قالاسىندا وتەدى دەپ جوسپارلانۋدا. ول جاقتا ءال-فارابي اتىنداعى قازۇۋ وتكىزەمىز دەپ ۇسىنىس ءبىلدىرىپ وتىر. ول بويىنشا ماسەلەلەر شەشىلىپ جاتىر. ءبىر-ەكى كۇندە ناقتىلانادى. وسى ويىنداردىڭ سوڭىندا ەسەنوۆ ءال-فارابيگە ۋنيۆەرسيادا جالاۋىن تاپسىراتىن بولادى.
– ۋنيۆەرسياداعا نەگىزىنەن ۋنيۆەرسيتەت ستۋدەنتتەرى قاتىسادى. ۋنيۆەرسيتەتتەر عىلىم جانە جوعارى ءبىلىم مينيسترلىگىنە قارايدى. ال ءسىزدىڭ باسقارماڭىز – وقۋ-اعارتۋ مينيسترلىگىنە قاراستى قۇرىلىم. سايكەسسىزدىكتەر جۇمىستارىڭىزعا كەدەرگى ەمەس پە؟
– نەگىزى ورتالىعىمىز 2000 جىلى اشىلعان بولاتىن. 2001 جىلدان باستاپ ءبىزدىڭ ورتالىق جازعى جانە قىسقى ۋنيۆەرسيادانى وتكىزىپ كەلەدى. ول كەزدە ءبىر مينيسترلىك بولدى. كەيىن ەكىگە بولىنگەن سوڭ ءبىز وسى ۋنيۆەرسيادانى عىلىم جانە جوعارى ءبىلىم مينيسترلىگىمەن كەلىسىمشارتقا وتىرىپ وتكىزىپ ءجۇرمىز. نەگىزى ءبىزدىڭ ورتالىق عىلىم باعىتىندا جانە مۇعالىمدەر اراسىندا بىلىكتىلىكتى ارتتىرۋ كۋرستارىن، سونداي-اق سپورت شارالارىن وتكىزەدى. ءبىز تەك ستۋدەنتتەر اراسىندا ەمەس، وقۋشىلار اراسىندا دا، كوللەدج ستۋدەنتتەرى اراسىندا دا جارىستار ۇيىمداستىرامىز. وقۋشىلار اراسىندا گيمنازيادا وتكىزىپ، ولاردى ىرىكتەپ، حالىقارالىق جارىستارعا اپارامىز.
مىسالى، بىلتىر وقۋشىلاردى فرانتسياعا اپاردىق. بۇكىلالەمدىك گيمنازيادادا جەڭىمپاز بولعان وقۋشىلارىمىز گرانتقا يە بولدى. قازاقستان بويىنشا وزدەرى تاڭداعان جوعارى وقۋ ورىندارىنا ۇبت تاپسىرماي-اق گرانتقا ءتۇستى. وتكەن جىلدارى بىتىرگەن وقۋشىلار قازىر گرانتتا وقىپ جاتىر. بيىل 11-سىنىپتى بىتىرەتىن وقۋشىلارىمىز دا گرانت يەلەنەدى. ويتكەنى گرانتتار ءۇش جىلعا بەرىلگەن بولاتىن. سەبەبى گيمنازياداعا قاتىسقاندار توعىزىنشى، ونىنشى، ون ءبىرىنشى سىنىپ وقۋشىلارى بولدى. سوندىقتان ونى ءۇش جىلعا دەپ بەردىك. وسىنداي جۇمىستارىمىزدى جالعاستىرا بەرەمىز.
– شاعىن اقپاراتىڭىزعا راقمەت! الدا ۋنيۆەرسيادا بويىنشا كەڭىنەن سۇحبات قۇرامىز دەپ سەنەمىز.
ايبەك مۇحانوۆ،
قازاقستان جۋرناليستەر وداعىنىڭ مۇشەسى
