«Ol meni aldap ketti»: reseılik boksshy Nurbek Oralbaıdan jeńilgenin moıyndamady (VIDEO)

Reseılik boksshy Imam Hataev Russian today aqparat agenttigine bergen suhbatynda Tashkentte bokstan eresekter arasynda ótken álem chempıonatynda Nurbek Oralbaıdan jeńilgenin moınydamaıtynyn aıtty.

Eske sala ketsek, qazaq boksshysy 80 keli salmaqta reseılik sportshyny jartylaı fınalda jeńip, fınalǵa shyqqan bolatyn.

– Qola medal da úlken jetistik qoı. Alaıda siz bir sózińizde álem chempıoantyna altyn júlde alý úshin barǵanyńyzdy aıtyp qaldyńyz. Álemdik dodadaǵy nátıjege kóńilińiz tola ma?

– Iá, men altyn júlde úshin bardym. Bul meniń qolymnan keletinine sengen edim. Biraq bári men oılaǵandaı bolmady. Nurbek Oralbaımen jekpe-jektiń sheshimimen kelispeımin. Tóreshiler durys istemedi. Birinshi raýndta oǵan bes tóreshiniń tórteýi jeńisti berdi. Al ekinshi raýndty tolyqtaı qazaqstandyq boksshyǵa bere saldy. Beınetaspada bári kórinip tur.

– Endi sizge ne unamaıdy sonda?

– Meni bokstyń qazirgi jaǵdaıy alańdatady. Adamdar aıqasýǵa emes, qashyp júrip utýǵa tyrysady. Qazirgi qolǵappen de nokaýtqa túsirý múmkin emes. Olar tym jumsaq. Bulaı jalǵasa berse, Olımpıadadaǵy jekpe-jekter de eshkimge qyzyq bolmaıdy.

– Sonda neni ózgertý kerek?

– Burynǵy qolǵaptardy qaıtarý kerek. Qazirgilermen nokaýtqa túsire almaısyń. Jekpe-jekte boksshynyń shıraq qımylyn, dál soqqylaryn sanaý kerek. Al boksshy qashyp júre berse, onda bokstyń bolashaqta ne bolatynyn bilmeımin.

– Oralbaımen jekpe-jek Olımpıadadaǵy Bendjamın Ýıttakermen jekpe-jekke uqsaıdy eken. Siz bul joly da birinshi nómirde judyryqtastyńyz. Al Oralbaı bolsa, ashyq aıqastan qashty. Shynymen solaı boldy ma?

– Oralbaı ǵana emes, Krıstıan Pınıales te solaı judyryqtasty. Ol taktıkany Ýıttakerden alǵan. Menimen ashyq aıqasýdan qashý úshin bárin istedi. Olardy túsinemin. Biraq tóreshiler mundaıdy qalaısha qoldaıtyny oıyma qonbaıdy.

– Kimmen jekpe-jek qıyndaý boldy? Oralbaımen be, álde Ýıttakermen be?

– Eger olardyń biri menimen rıng ortasynda turyp, soqqy almasqanda kimniń sońynan júgiretinimdi bilmeı qalatyn edim.

– Kimniń artynan júgiretin edińiz?

– Aıtý qıyn. Ekeýin de qýalap júrý ońaı bolmady.

– Oralbaımen ekinshi nómirde bokstaspadyńyz ba?

– Olaı da isteýge bolatyn edi. Biraq ol ashyq shabýylǵa shyqpady. Sol sebepti men birinshi nómirde bokstasýǵa tyrystym. Men onymen buǵan deıin de qolǵap túıistirgen edim. Ol – shabýyldyń adamy. Shabýyldy jaqsy kóredi. Men osy joly da solaı bolady dep oılap edim. Qatelesken ekenmin. Onyń shabýylǵa shyqpaı, ańdyp júrgenine tańqaldym. Taktıkasy kádimgideı tosyn syı boldy. Ol eki raýndta jeńgennen keıin úshinshisinde ony ózime tartyp bokstasýǵa kesh bolǵanyn túsindim. Qysqasy, taktıkasyna tańqaldym. Ol meni aldap ketti.

Dastan KENJALIN,

ASTANA