تاعىلىمى زور تارتىمدى كەزدەسۋ

ەلىمىزدىڭ ءار وڭىرىندە 1 ماۋسىم حالىقارالىق بالالاردى قورعاۋ كۇنىنە وراي «بالالاردىڭ يگىلىگى ءۇشىن» اتتى رەسپۋبليكالىق اكتسيا ءوتىپ جاتقانى بەلگىلى. وسى اكتسيا اياسىندا كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىندە بوكستان بەيجىڭ وليمپياداسىنىڭ قولا جۇلدەگەرى، كاسىپقوي بوكسشى، WBO ورتا سالماقتاعى قۇرلىقارالىق چەمپيونى، «قۇرمەت» وردەنىنىڭ يەگەرى قانات يسلاممەن كەزدەسۋ بولىپ ءوتتى.

«بۇكىل ادامزاتتىڭ كەلەشەگى — جاس جەتكىنشەكتەردىڭ قانداي يدەال نەگىزىندە تاربيەلەنىپ، قالاي وسۋىنە، كەلمەلدەنۋىنە بايلانىستى»، -دەگەن ەكەن عابيت مۇسىرەپوۆ. ەندەشە، جاس ۇرپاقتى  تۇلعالار ارقىلى تاربيەلۋدىڭ ماڭىز زور. بالا بالعىن شاق كەزىندە بارىنە قۇمارتادى. ءبارىن بىردەن بىلگىسى كەلىپ تالپىنادى. ول ارينە، زاڭدىلىق. قازاق «بولار بالانىڭ بەتىن قاقپا بەلىن بۋ»، — دەگەن قاناتتى ءسوز قالدىرعان.

دارىندى بالالار كوپتەن ەرەك ومىرگە قۇشتار، اينالاسىنا مەيرىمدى، ىسىنە جاۋاپكەرلشىلىكپەن قاراۋدى ادەت ەتەدى. ءيا، ونىڭ بارلىعى تاربيەگە بايلانىستى. جاستىق شاق ادامعا ءبىر-اق رەت بەرىلەدى. سوندىقتاندا جاس جەتىكىنشەكتىڭ بويىنا ءبىلىم ءنارىن ەگە وتىرىپ بويىنداعى بار تالانتىن اشا ءبىلۋ اتا-اناعا عانا ەمەس، وسكەن ورتا مەن ءبىلىم وردالارىنا تىكەلەي قاتىستى ەمەس پە؟!

وسى باعىتتا دارىندى بالالاردى ەلەكتەن ەلەپ العانداي ءبولىپ الىپ وقىتىپ جاتقان مامانداندىرىلعان مەكتەپ-ينتەرناتتاردىڭ تاربيەسى ەرەكشە دەپ ايتامىز. مىسالى، الماتى قالاسىنداعى كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىندە ءدارىس الىپ جاتقان ءجاسوسپىرىم تالانتتى بالالار بىلىممەن سۋسىنداپ سپورتپەن شىعىلدانىپ، تولاعاي تابىستارمەن قۋانتىپ كەلەدى. ايتالىق، وسى مەكتەپتە وقيتىن جاس بۋىن كوپتەگەن ءىرى حالىقارالىق، الەمدىك، ەۋروپالىق ءتىپتى، وليمپيادالىق جارىستاردا جۇلدەلى ورىنداردان كورىنىپ، ەل نامىسىن ابىرويمەن قورعاپ ءجۇر. ال، مەكتەپ قابىرعاسىندا ۇستازدىق ۇجىمنىڭ تىڭعىلىقتى جۇمىستارىنىڭ ارقاسىندا بۇل مەكتەپكە كوپتەگەن الەم سىندارىندا توپجارعان قازاقتىڭ سپورت جۇلدىزدارى باس سۇعىپ، جاستارمەن ءجيى سۇحبات جاساپ، ۇلكەن ونەگە بولىپ ءجۇر.

تۇلعالار ارقىلى تاربيەگە ايتۋلى مەكتەپ ۇلكەن دەن قويعان. سونىڭ جەمىسىن دە كورىپ جاتىر. ايتقان ءسوزىمىزدىڭ دالەلى، كەشە عانا كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىنە اتى ايگىلى بىلعارى قولعاپ شەبەرى قانات يسلام ارنايى شاقىرلىپ، جاس جەتكىنشەكتەر تۇلعالى سپورتشىمەن كەزدەسۋدەن تاماشا اسەر الدى. تارتىمدى وتكەن كەزدەسۋ سوڭىندا كاركەن احمەتوۆ اتىنداعى وليمپيادا رەزەرۆىنىڭ رەسپۋبليكالىق مامانداندىرىلعان مەكتەپ-ينتەرنات-كوللەدجىندىڭ ديرەكتورى ەرنار تالاسبەك ۇلى قۇرمەتتى قوناقتىڭ التىن ۋاقىتىن ءبولىپ كەلگەنى ءۇشىن  ۇجىمنىڭ اتىنان زور العىسىن ءبىلدىردى.

نەگىزى بۇل وتكەن كەزدەسۋ جوعارىدا ايتىپ وتكەنىمىزدەي، 1 ماۋسىم حالىقارالىق بالالاردى قورعاۋ كۇنىنە وراي «بالالاردىڭ يگىلىگى ءۇشىن» اتتى رەسپۋبليكالىق اكتسياعا وراي ۇيىمداستىرىلعان ەدى. ايتۋلى مەكتەپ-ينتەرنات باسشىلىعىنىڭ وسىنداي يگىلىكتى شارانى وتكىزۋدەگى باستى ماقساتى — سالاۋاتتى ءومىر سالتىن ناسيحاتتاۋ، بالالاردىڭ دەنساۋلىعىن نىعايتۋ.

كەزدەسۋ كەشىنە سپورت مەكتەپ-ينتەرنات-كوللەدجدىڭ ۇجىمى مەن سپورتشىلارى قاتىستى. جاستارمەن سۇحبات بارىسىندا قانات يسلام ءوزىنىڭ ءومىرى جايلى، سپورتتا جەتكەن جەتىستىكتەرىمەن ءبولىسىپ، سپورتپەن قاتار ءبىلىمدى دە الىپ ءجۇرۋ كەرەك ەكەنىن، سپورتپەن تىڭعىلىقتى شۇعىلدانىپ، چەمپيون بولۋ ءۇشىن تەمىردەي تارتىپكە باعىنۋ كەرەك، ۇلكەنگە قۇرمەت، كىشىگە ىزەت كورسەتۋ كەرەك ەكەنىن دە اتاپ ءوتتى. اۋەسقوي جانە كاسىپقوي بوكستىڭ ايىرماشىلىقتارى مەن جاتتىعۋلارىن دا ايتتى. اڭگىمەلەسۋ ەركىن فورماتتا بولعاندىقتان، جاس سپورتشىلار اتاقتى سپورتشىمىزعا وزدەرىن تولعاندىرعان ءتۇرلى ساۋالدارىن قويىپ، ولارعا تۇشىمدى جاۋاپتار الدى. وسىنداي كەزدەسۋلەر ۇيىمداستىرۋ ارقىلى سپورتشىلارىمىزدى پاتريوتتىق سەزىمگە، ۇلتجاندىلىققا، وتانىن سۇيۋگە، ەلىمىزدىڭ اتاقتى تۇلعالارى مەن سپورتشىلاردىڭ ومىرلەرىمەن تانىسىپ، وزدەرىنە قاجەتتى ماعلۇمات الىپ وتىرادى. قادىرمەندى قوناققا جاس سپورتشىلارىمىز دا ءوز ونەرلەرىن كورسەتىپ، ءان مەن بيدەن شاشۋ شاشتى. دىنمۇحاممەد قوناەۆ قورىنان كەلگەن ارنايى وكىل بەك سرايلوۆ مىرزا قور اتىنان قانات يسلامعا ءتوس بەلگىسىن تاعىپ، دىنمۇحاممەد قوناەۆ اتامىزدىڭ كىتابىن سىيعا تارتتى.

كەش سوڭىندا جاس سپورتشىلارىمىز قوناقتارمەن سۋرەتكە ءتۇستى. وسىنداي تاعىلىمى زور تارتىمدى كەزدەسۋلەر الداعى ۋاقىتتا دا ۇيىمداستىرۋ جوسپاردا بار ەكەن. ءيا، ءوزىمىزدىڭ اتتارى ايشىقتى سپورت ارداگەرلەرىمەن ءجيى وتكىزگەن كەزدەسۋلەر ارقىلى جاستاردىڭ سپورتقا دەگەن قۇلشىنىسى ارتا تۇسەرى انىق. سوندىقتان دا «جاس كۇنىڭ –ونەر ىزدەۋ، ناق دەر شاعىڭ» دەمەكشى، جالىندى جاس شاعىندا العان ءبىلىم، سپورت ومىرىندە تاسقا جازىلعان جازۋداي بويدا  قالىپتاسىپ قالاتىن بولعاندىقتان، التىن ۋاقىتتتا بوس وتكىزبەي پايدالى ىسپەن اينالىسۋدىڭ ماڭىزى زور.

اقىن ورداباي ۇلى،

ەرجىگىت يبراگيموۆ

الماتى