SportPress.kz قازاقستان سپورت جاڭالىقتارى
قازاقستان ۇلتتىق قۇراماسىنىڭ باس جاتتىقتىرۋشىسى ماگومەد اديەۆ سولتۇستىك يرلانديا كومانداسىمەن ويىن الدىندا باق وكىلدەرىنە شاعىن سۇحبات بەرىپ، سۇراقتارىنا جاۋاپ بەردى.
— ماگومەد مۇسا ۇلى، سولتۇستىك يرلانديامەن وتەتىن ويىننان نە كۇتەسىز؟
— سالماقتى ءارى قيىن ويىن بولادى. ولار ءوز الاڭىندا سوڭعى رەت ءساتسىز وينادى. سول سەبەپتى سولتۇستىك يرلانديا اشۋىن بىزدەن العىسى كەلىپ تۇر.
— سولتۇستىك يرلانديا قۇراماسىنىڭ باس جاتتىقتىرۋشىسى: «قازاقستان قۇراماسىنا تالداۋ جاساۋ قيىن. ويىنشىلارى دا اسا تانىمال ەمەس»، دەگەن ەكەن. قارسىلاس كوماندا قازاقستان قۇراماسىن جاقسى بىلمەسە، بىزگە جاقسى ما؟ قالاي ويلايسىز؟
— تالداۋ جاساۋ قيىن دەگەن سوزىمەن كەلىسپەيمىن. ويتكەنى، كومانداعا تالداۋدى جاتتىقتىرۋشى جاسايدى. سوندىقتان بىزگە ودان كەلىپ-كەتەر ەشتەڭە جوق. ءبىزدىڭ ويىنشىلاردى ءبارى بىلەدى. سىرتتاي باقىلاسىن، كورسىن. ەشقانداي پروبلەما جوق.
— ابات ايىمبەتوۆ قۇراماعا قايتا ورالىپتى. ابات ءسىز ءۇشىن وتە ماڭىزدى ويىنشى ما؟
— ءبىز ءۇشىن ءار فۋتبولشى ماڭىزدى. ابات كوپتەگەن ويىندا ناتيجە الىپ كەلدى. گول سوقپاسا دا كوماندا ءۇشىن بار كۇشىن سالادى.
— سولتۇستىك يرلانديا بريتاندىق فۋتبول وينايدى. دوپقا تالاسادى. كوپ جۇگىرەدى. ويىن قالاي بولادى دەپ ويلايسىز؟
— ءيا، ولار باياعىدان بەرى سولاي وينايدى. كوپ جۇگىرۋگە تۋرا كەلەدى. قاپتالداعى ويىنشىلاردى قوسۋعا تالپىنادى. تارتىستى ويىن بولادى دەپ ويلايمىن. سوندىقتان بىزگە الاڭنىڭ ورتاسىندا ويىندى وزگەرتىپ وتىرۋ كەرەك. الاڭنىڭ ورتاسىندا دوپقا تالاس كوپ بولادى.
— وتكەن ويىننان كەيىن ويىنشىلاردىڭ بارلىعى قاتاردا ما؟ قازاقستان قۇراماسى قورعانىسقا كوپ كوڭىل بولە مە؟
— بارلىق ويىنشى قاتاردا. ەشقانداي پروبلەما جوق. ويىن تۋرالى ايتاتىن بولسام، مەنىڭ ۇستانىمىمدى جاقسى بىلەسىزدەر. الداعى كەزدەسۋدە بارلىعى الاڭنىڭ ورتاسىنداعى ويىنعا بايلانىستى بولادى.
— سان-مارينومەن ماتچقا قاتىسپاعان جىگىتتەر تىزىمگە كىردى مە؟
— ويلانامىز. ءۇش ويىنشى تىزىمگە كىرگەن جوق. ونىڭ بىرەۋى ورتالىق قورعاۋشى. مەنىڭ شەشىمىم جىگىتتەرگە ۇناماۋى مۇمكىن. مەن تارازى باسىندا كوماندانىڭ ناتيجەسى مەن جىگىتتىردىڭ رەنىشى تۇرسا، ءبىرىنشىسىن تاڭدايمىن. مەنىڭ ۇستانىمىم سول. بىزگە ناتيجە كەرەك. ءوز سوزىمدە تۇرامىن.
— ءبىزدىڭ توپتاعى ءتورت كوماندانىڭ التى ۇپايى بار. سوڭعى تۋرعا دەيىن ماتچتار تارتىستى بولادى دەپ ويلايسىز با؟
-ءبىزدىڭ توپ — قيىن توپ. ونى ىرىكتەۋ باستالماي تۇرىپ ايتقانمىن. بارلىعى ۇپاي جوعالتادى دەپ ايتقانمىن. سوڭعى تۋرعا دەيىن سولاي بولاتىن شىعار. وعان تاڭعالمايمىن.
-سان-مارينومەن ويىنعا كوڭىلىڭىز تولا ما؟
— العاشقى تايم جاقسى بولدى دەپ ايتا المايمىن. ءبىزدىڭ ويىنشىلار پوزيتسيالىق شابۋىل جاساي المادى. ءبىرىنشى تايمنىڭ سوڭىنا قاراي گول سالىپ، اشىلا باستادىق.
ەكىنشى تايمدا جاسىل الاڭعا ويىن مانەرى باسقا فۋتبولشىلار شىقتى. ءبىز جوسپار بويىنشا ويىننىڭ قارقىنىن باسەڭدەتۋگە تىرىستىق. سول ويىمىز ىسكە استى. ادەمى ويىندى كورسەتپەي، ۇش ۇپايدى الۋدى كوزدەدىك. ماقسات قارسىلاستى جەڭىپ، سولتۇستىك يرلاندياعا دايىندالۋ بولدى.
سان-مارينو قۇراماسى جاقسى قورعاندى. ويىندارىندا جۇيە بار ەكەن. ولار بىزبەن جاقسى وينادى. وزدەرىن ەركىن ۇستاپ، ەركىن وينادى. بىراق ولاردى ويىن جۇيەسىنەن شىعارىپ تاستادىق.
