Soltústik Irlandııa ashýyn bizden alǵysy kelip tur – Magomed Adıev

Qazaqstan ulttyq quramasynyń bas jattyqtyrýshysy Magomed Adıev Soltústik Irlandııa komandasymen oıyn aldynda BAQ ókilderine shaǵyn suhbat berip, suraqtaryna jaýap berdi.

— Magomed Musauly, Soltústik Irlandııamen ótetin oıynnan ne kútesiz?  

— Salmaqty ári qıyn oıyn bolady. Olar óz alańynda sońǵy ret sátsiz oınady. Sol sebepti Soltústik Irlandııa ashýyn bizden alǵysy kelip tur.

— Soltústik Irlandııa quramasynyń bas jattyqtyrýshysy: «Qazaqstan quramasyna taldaý jasaý qıyn. Oıynshylary da asa tanymal emes», degen eken. Qarsylas komanda Qazaqstan quramasyn jaqsy bilmese, bizge jaqsy ma? Qalaı oılaısyz?

— Taldaý jasaý qıyn degen sózimen kelispeımin. О́ıtkeni, komandaǵa taldaýdy jattyqtyrýshy jasaıdy. Sondyqtan bizge odan kelip-keter eshteńe joq. Bizdiń oıynshylardy bári biledi. Syrttaı baqylasyn, kórsin. Eshqandaı problema joq.

— Abat Aıymbetov quramaǵa qaıta oralypty. Abat siz úshin óte mańyzdy oıynshy ma? 

— Biz úshin ár fýtbolshy mańyzdy. Abat kóptegen oıynda nátıje alyp keldi. Gol soqpasa da komanda úshin bar kúshin salady.

— Soltústik Irlandııa brıtandyq fýtbol oınaıdy. Dopqa talasady. Kóp júgiredi. Oıyn qalaı bolady dep oılaısyz?

— Iá, olar baıaǵydan beri solaı oınaıdy. Kóp júgirýge týra keledi. Qaptaldaǵy oıynshylardy qosýǵa talpynady. Tartysty oıyn bolady dep oılaımyn. Sondyqtan bizge alańnyń ortasynda oıyndy ózgertip otyrý kerek. Alańnyń ortasynda dopqa talas kóp bolady.

— О́tken oıynnan keıin oıynshylardyń barlyǵy qatarda ma? Qazaqstan quramasy qorǵanysqa kóp kóńil bóle me? 

— Barlyq oıynshy qatarda. Eshqandaı problema joq. Oıyn týraly aıtatyn bolsam, meniń ustanymymdy jaqsy bilesizder. Aldaǵy kezdesýde barlyǵy alańnyń ortasyndaǵy oıynǵa baılanysty bolady.

— San-Marınomen matchqa qatyspaǵan jigitter tizimge kirdi me?  

— Oılanamyz. Úsh oıynshy tizimge kirgen joq. Onyń bireýi ortalyq qorǵaýshy. Meniń sheshimim jigitterge unamaýy múmkin.  Men tarazy basynda komandanyń nátıjesi men jigittirdiń renishi tursa, birinshisin tańdaımyn. Meniń ustanymym sol. Bizge nátıje kerek. О́z sózimde turamyn.

— Bizdiń toptaǵy tórt komandanyń alty upaıy bar. Sońǵy týrǵa deıin matchtar tartysty bolady dep oılaısyz ba? 

-Bizdiń top — qıyn top. Ony irikteý bastalmaı turyp aıtqanmyn. Barlyǵy upaı joǵaltady dep aıtqanmyn.  Sońǵy týrǵa deıin solaı bolatyn shyǵar. Oǵan tańǵalmaımyn.

-San-Marınomen oıynǵa kóńilińiz tola ma?

—  Alǵashqy taım jaqsy boldy dep aıta almaımyn. Bizdiń oıynshylar pozıııalyq shabýyl jasaı almady. Birinshi taımnyń sońyna qaraı gol salyp, ashyla bastadyq.

Ekinshi taımda jasyl alańǵa oıyn máneri basqa fýtbolshylar shyqty. Biz jospar boıynsha oıynnyń qarqynyn báseńdetýge tyrystyq.  Sol oıymyz iske asty. Ádemi oıyndy kórsetpeı, úsh upaıdy alýdy kózdedik. Maqsat qarsylasty jeńip, Soltústik Irlandııaǵa daıyndalý boldy.

San-Marıno quramasy jaqsy qorǵandy. Oıyndarynda júıe bar eken. Olar bizben jaqsy oınady. О́zderin erkin ustap, erkin oınady. Biraq olardy oıyn júıesinen shyǵaryp tastadyq.