رىباكينا بەرلين ءتۋرنيرىن جەڭىسپەن باستادى

الەمنىڭ ءۇشىنشى راكەتكاسى ەلەنا رىباكينا گەرمانيانىڭ بەرلين قالاسىندا ءوتىپ جاتقان WTA 500 ءتۋرنيرىنىڭ ەكىنشى اينالىمىنا شىقتى.

جارىستىڭ ەكىنشى راكەتكاسى بولىپ تىركەلگەن تەننيسشى العاشقى اينالىمدا دۇنيەجۇزىلىك رەيتينگتە 139-ورىندا تۇرعان، ىرىكتەۋ سايىسى جەڭىمپازدارىنىڭ ءبىرى، 20 جاستاعى رەسەيلىك سپورتشى پولينا كۋدەرمەتوۆامەن كەزدەستى.

ءبىرىنشى پارتيادا ەسەپ 5:4 بولعان كەزدە ەلەنا برەيك جاسادى. ءبىرىنشى سەت وسىلاي  6:4 ەسەپپەن اياقتالدى.

ەكىنشى سەتتە رىباكينا 3:0 ەسەبىمەن العا شىقتى. سوسىن ول ماتچتى تاعى ءبىر برەيكپەن تۇيىندەدى. ءسويتىپ، قورىتىندى ەسەپ 6:4، 6:2 بولدى.

ماتچ ءبىر ساعاتتان استام ۋاقىتقا سوزىلدى. وسى ۋاقىتتا ەلەنا رىباكينا 9 ەيس جاساپ، 11 برەيك-پوينتتىڭ ۇشەۋىن پايدالاندى.

وسى جەردە ايتا كەتەتىن ءبىر نارسە، پولينا كۋدەرمەتوۆانىڭ اپكەسى، الەمنىڭ 13-راكەتكاسى ۆەرونيكا كۋدەرمەتوۆا دا بەرليندە ءوتىپ جاتقان تۋرنيرگە قاتىسىپ جاتىر.

ەندى رىباكينا شيرەك فينالعا شىعۋ ءۇشىن الەمنىڭ 23-راكەتكاسى، حورۆاتيالىق دوننا ۆەكيچپەن كەزدەسەدى.

داستان كەنجالين،

استانا