Álemniń úshinshi raketkasy Elena Rybakına Germanııanyń Berlın qalasynda ótip jatqan WTA 500 týrnıriniń ekinshi aınalymyna shyqty.
Jarystyń ekinshi raketkasy bolyp tirkelgen tennısshi alǵashqy aınalymda dúnıejúzilik reıtıngte 139-orynda turǵan, irikteý saıysy jeńimpazdarynyń biri, 20 jastaǵy reseılik sportshy Polına Kýdermetovamen kezdesti.
Birinshi partııada esep 5:4 bolǵan kezde Elena breık jasady. Birinshi set osylaı 6:4 eseppen aıaqtaldy.
Ekinshi sette Rybakına 3:0 esebimen alǵa shyqty. Sosyn ol matchty taǵy bir breıkpen túıindedi. Sóıtip, qorytyndy esep 6:4, 6:2 boldy.
Match bir saǵattan astam ýaqytqa sozyldy. Osy ýaqytta Elena Rybakına 9 eıs jasap, 11 breık-poınttyń úsheýin paıdalandy.
Osy jerde aıta ketetin bir nárse, Polına Kýdermetovanyń ápkesi, álemniń 13-raketkasy Veronıka Kýdermetova da Berlınde ótip jatqan týrnırge qatysyp jatyr.
Endi Rybakına shırek fınalǵa shyǵý úshin álemniń 23-raketkasy, horvatııalyq Donna Vekıchpen kezdesedi.
Dastan KENJALIN,
ASTANA