ماحمۇد سابىرحان وليمپيادا ءۇشىن باسقا سالماققا اۋىستى

بوكستان الەم چەمپيونى ماحمۇد سابىرحان سالماق اۋىستىردى. ول QAZAQ RING YouTube ارناسىنا بەرگەن سۇحباتىندا سالماعىن كەلەسى جىلى پاريجدە بولاتىن وليمپيالىق ويىندارعا بولا اۋىستىرعانىن ايتىپ قالدى.

بوكسشى ەندى 57 كەلىگە دەيىنگى سالماق دارەجەسىندە قولعاپ تۇيىستىرەدى.

بىلەسىزدەر مە، كەز كەلگەن بوكسشىنىڭ ارمانى –  وليمپيالىق ويىندار. مەنىڭ سالماق دارەجەم — 54 كەلى. بىراق بۇل وليمپيادانىڭ سالماعى ەمەس. سوندىقتان ەندى 57 كەلىدە باق سىنايتىن بولامىن. بۇعان دەيىن تايلاندتا وتكەن 22 جاسقا دەيىنگى جاستار اراسىنداعى ازيا چەمپيوناتىندا وسى سالماقتا جۇدىرىقتاسىپ كوردىم. ناتيجە جامان ەمەس. ازيا چەمپيونى بولدىم، –  دەدى ول.

ونىڭ ايتۋىنشا، سالماق اۋىستىرعان وڭاي ەمەس. ءتىپتى، بۇرىنعىدان دا قيىنىراق بولۋى مۇمكىن. بۇل سالماقتا قارسىلاس كوپ. سوعان بايلانىستى باسەكەلەستىك تە بولادى.

بۇل سالماقتا وڭاي بولادى دەپ ايتا المايمىن. قازاقستان چەمپيوناتىندا جەڭىسكە جەتسەم، سونىڭ ءوزى ۇلكەن جەتىستىك بولادى. بۇل سالماقتا سەرىك تەمىرجانوۆ، وراز اسىلقۇلوۆ، سابىر ەربولات پەن باسقا دا بوكس شەبەرلەرى ونەر كورسەتەدى. ءبارىنىڭ ماقساتى، ارمانى ءبىر — وليمپياداعا بارۋ. سوندىقتان…باسەكەلەستىك كۇشتى بولادى، –  دەدى ماحمۇد سابىرحان.

ەسكە سالساق، ماحمۇد سابىرحان تاشكەنتتە 54 كەلىگە دەيىنگى سالماق دارەجەسىندە الەم چەمپيون اتانعان ەدى.

داستان كەنجالين،

استانا