Mahmud Sabyrhan Olımpıada úshin basqa salmaqqa aýysty

Bokstan álem chempıony Mahmud Sabyrhan salmaq aýystyrdy. Ol QAZAQ RING YouTube arnasyna bergen suhbatynda salmaǵyn kelesi jyly Parıjde bolatyn Olımpııalyq oıyndarǵa bola aýystyrǵanyn aıtyp qaldy.

Boksshy endi 57 kelige deıingi salmaq dárejesinde qolǵap túıistiredi.

Bilesizder me, kez kelgen boksshynyń armany –  Olımpııalyq oıyndar. Meniń salmaq dárejem — 54 keli. Biraq bul Olımpıadanyń salmaǵy emes. Sondyqtan endi 57 kelide baq synaıtyn bolamyn. Buǵan deıin Taılandta ótken 22 jasqa deıingi jastar arasyndaǵy Azııa chempıonatynda osy salmaqta judyryqtasyp kórdim. Nátıje jaman emes. Azııa chempıony boldym, –  dedi ol.

Onyń aıtýynsha, salmaq aýystyrǵan ońaı emes. Tipti, burynǵydan da qıynyraq bolýy múmkin. Bul salmaqta qarsylas kóp. Soǵan baılanysty básekelestik te bolady.

Bul salmaqta ońaı bolady dep aıta almaımyn. Qazaqstan chempıonatynda jeńiske jetsem, sonyń ózi úlken jetistik bolady. Bul salmaqta Serik Temirjanov, Oraz Asylqulov, Sabyr Erbolat pen basqa da boks sheberleri óner kórsetedi. Báriniń maqsaty, armany bir — Olımpıadaǵa barý. Sondyqtan…básekelestik kúshti bolady, –  dedi Mahmud Sabyrhan.

Eske salsaq, Mahmud Sabyrhan Tashkentte 54 kelige deıingi salmaq dárejesinde álem chempıon atanǵan edi.

Dastan KENJALIN,

ASTANA