قايماعى بۇزىلماعان قوساعاش (فوتو)

موڭعوليانىڭ ۇلان-باتىر، نالايح، حوۆدا، بايان-ولگەي ايماقتارىندا بولعان كەزدەسۋ التاي رەسپۋبليكاسىنىڭ قوساعاش اۋدانىندا جالعاستى.

ورىس، التاي، قازاق حالىقتارىنىڭ تاتۋلىقتى تۋ ەتكەن مەكەنىندە قۇرامىندا «وتانداستار» قورىنىڭ پرەزيدەنتى ابزال ساپاربەك ۇلى جانە پارلامەنت دەپۋتاتتارى عالياسقار سارىباەۆ پەن بولات كەرىمبەك پەن ءبىر توپ زيالى قاۋىم وكىلدەرى بار رەسمي دەلەگاتسيانى قوساعاش اۋدانىنىڭ اكىمى سەرىكجان مۇراتحان ۇلى مەن اۋدان ءماسليحاتىنىڭ توراعاسى ساناش ديدۋنوۆ شەكارا شەبىنەن قارسى الىپ، التاي قازاقتارىنىڭ مۇراسى ساقتالعان جاڭا اۋىل ەلدىمەكەنىنە الىپ باردى. دەلەگاتسيا مۇشەلەرى ءوڭىردىڭ تۇرمىس-تىرشىلىگىمەن تانىسىپ، وسىنداعى ۇلتتىق قۇندىلىقتار دارىپتەلگەن مۇراجايدى ارالادى.

التاي رەسپۋبليكاسىندا اۋماعى جاعىنان ەڭ ۇلكەن جانە ءۇش بىردەي ەلمەن شەكارالاس جاتقان (موڭعوليا، قازاقستان، قىتاي) قوساعاش اۋدانىنىڭ حالقى قازاقى ءداستۇرى مەن سالتىن جاقسى ساقتاعان. اتاپ وتەرلىگى، رەسەيدەگى قازاق تىلىندە 1-5 سىنىپتارعا ارنالعان وقۋلىق وتكەن جىلى وسى جەردە ۇستازداردىڭ ۇزاق جىلعى ەڭبەگىمەن وسى اۋداندا قولدانىسقا ەندى.​

حالىقپەن كەزدەسۋ، تۇرعىندارمەن تىلدەسۋ اۋدان ورتالىعىندا ورنالاسقان ساياباقتا رەسمي دەلەگاتسيامەن قاتار جۇرگەن قاراعاندىلىق «تاتتىمبەت» اتىنداعى اكادەميالىق ۇلتتىق اسپاپتار وركەستردىڭ سالتاناتتى كونتسەرتىمەن جالعاستى. بۇل ءىس-شارالار رەسەي حالقىنىڭ وتباسى كۇنىمەن ورايلاس كەلدى.

قازاقستان تاۋەلسىزدىك العاننان بەرى العاش رەت وسى دەڭگەيدە قازاقشا كونتسەرت تىڭداعان قوساعاشتىقتار ەرەكشە قۋانىشقا بولەنىپ، كوزدەرىنە جاس الدى. اتامەكەننەن الىستا جاتقان التاي قازاقتارىنىڭ كوڭىلى مارقايىپ، رۋحى اسقاقتاپ، قازاقستانعا دۇعاي سالەمدەرىن جەتكىزدى.​

ءىس-شارا سوڭىندا ايماق حالقىنىڭ بىرلىگى، قازاق ءتىلىن ساقتاۋ جولىندا ايانباي ەڭبەك ەتىپ جۇرگەن قوساعاشتاعى قازاق مادەني ورتالىعىنىڭ باسشىسى ارقالىق سۇلتانوۆ قازاقستان پرەزيدەنتى قاسىم-جومارت توقاەۆتىڭ ءتوس بەلگىلى العىس حاتىمەن ماراپاتتالدى. سونىمەن قاتار اۋدان اكىمى سەرىكجان مۇراتحان ۇلى مەن اۋدان ءماجىلىس توراعاسى ساناش ديدۋنوۆقا «وتانداستار» قورىنىڭ العىس حاتى مەن «العىس» ەستەلىك مەدالى تابىس ەتىلدى.

باسقوسۋ اياقتالىپ، دەلەگاتسيا قۇرامى ەلگە قايتار تۇستا «قازاقستان كەتىپ بارا جاتىر» — دەپ قۇشاقتاپ، قيماستىقتىڭ كوز جاسىنا ەرىك بەرگەن تۇرعىندار، ۇزاق ۋاقىت كوز الماي جولعا شىققان كولىككە قاراپ تۇردى.

«Otandastar qory» باسپاسوز قىزمەتى

فوتو:  «Otandastar qory» ءباسپاسوز قىزمەتى