اتىراۋلىق كاسىپكەر ارداگەرلەرگە فۋتبول الاڭىن سالىپ جاتىر

اتىراۋ قالاسىنداعى «جيلگورودوك» اتانىپ كەتكەن كوپىر استىندا ارداگەرلەرگە ارنالعان شاعىن فۋتبول الاڭنىڭ قۇرىلىسى باستالدى. بۇل الاڭدى ارداگەرلەرگە ارناپ بەلگىلى كاسىپكەر، «سانجار» قوعامدىق بىرلەستىگىنىڭ توراعاسى نۇرلان جولبولوۆ سالىپ جاتىر.

AtyrauPress-ءتىڭ حابارلاۋىنشا، الاڭنىڭ دوپ تەبەتىن اۋماعىنىڭ ءوزى مىڭ شارشى مەترگە جۋىقتايدى. بۇدان بولەك، ونىڭ سىرتى قورشالىپ، اينالاسىنا 100-گە جۋىق اعاش ەگىلەدى. كەلۋشىلەرگە ىڭعايلى بولۋ ءۇشىن كولىك قوياتىن ورىن سالىنىپ، بيودارەتحانا دا قويىلادى. كورەرمەندەر ءۇشىن  80-100 ورىنعا ارنالعان تريبۋنا سالىنادى.

ارداگەرلەر سپورتىنا كوڭىل ءبولىنۋ قاجەت. ماسەلەن، فۋتبولشىلار 35 جاستان سوڭ كاسىبي تۇردە بۇل ويىندى ويناي المايدى.. ولارعا سپورتسىز ءومىر ءسۇرۋ قيىن. قازىر مەن ۇنەمى قولداپ، دەمەۋشىلىك جاساپ كەلە جاتقان «سانجار» ارداگەرلەر فۋتبول كومانداسىندا «سپورت دەسە ىشكەن اسىن جەرگە قوياتىن» 12 ادام بار. ولاردىڭ اراسىندا 40-70 جاستان اسقان كىسىلەر دوپ تەۋىپ ءجۇر، — دەدى كاسىپكەر.

سوندىقتان، ونىڭ ايتۋىنشا، ارداگەر فۋتبولشىلارعا كاسىپقوي سپورتتان كەتكەننەن كەيىن ونى ءبىرجولاتا تاستاپ كەتۋگە بولمايدى. قازىر ءوزى قۇرعان «سانجار» ارداگەرلەر فۋتبول كومانداسىندا ءارتۇرلى دەڭگەيدەگى جارىستاردا جەڭىمپاز اتانىپ، اتىراۋدىڭ نامىسىن قولدان بەرمەي كەلەدى. سونىڭ ىشىندە كوماندا بىرنەشە رەت قازاقستان چەمپيونى دا اتانعان.

وسىعان دەيىن ءبىز ىڭعايى كەلگەن جەردە، اقشاسىن تولەپ جاتتىقتىق. ال مۇنداي جاعداي ارينە، قىسى-جازى اتىراۋ وبلىسىنىڭ چەمپيوناتىنا قاتىساتىن 100-200 فۋتبول ارداگەرى ءۇشىن فۋتبول ويناۋ وڭاي ەمەس. ەندى وسى الاڭ سالىنىپ بولعان سوڭ سپورتشىلار ەشتەڭەگە الاڭداماي جاتتىعادى، — دەدى نۇرلان جولبولوۆ.

كاسىپكەردىڭ ايتۋىنشا،بۇل جەردە باسقا دا سپورتتىق شارالار دا وتەدى. بۇل ازىرگە اشىق الاڭ بولادى. ال بولاشاقتا قىس مەزگىلىندە دە جاتتىعۋعا ىڭعايلى بولۋ ءۇشىن توبەسى مەن جان-جاعى پانەلمەن جابىلادى. بۇل ازىرشە جوسپار. ويتكەنى، سالىنىپ جاتقان الاڭعا باستاپقى جوسپارلانعان سومادان دا كوپ شىعىن كەتكەن. ماسەلەن، ءبىر عانا دانەكەرلەۋ جۇمىستارىنا 5 ملن استام تەڭگە جۇمسالعان، گازوننىڭ ءوزى  6 ملن، ودان دا باسقا قۇرىلىس ماتەريالدارىنا دا كوپ اقشا جۇمسالعان.

شاعىن فۋتبولعا ارنالعان الاڭدى سالۋ جۇمىستارى 1 شىلدەدە باستالدى. 31 شىلدەگە دەيىن تولىق اياقتالىپ، پيادالانۋعا بەرىلەدى دەپ جوسپارلانىپ وتىر.

فوتو: Atpress.kz