ادىلبەك مۋسين سۋعا جۇزۋدەن ەكى دۇركىن ازيادا جۇلدەگەرى اتاندى

قىتايدىڭ حانچجوۋ قالاسىندا تاعى ءبىر سپورتشىمىز جۇلدە الدى. 50 مەترگە باتتەرفلياي ادىسىمەن جۇزۋدەن ادىلبەك مۋسين قولا مەدال الىپ، وسىمەن ەكى دۇركىن ازيادا جۇلدەگەرى اتاندى.

وسى سىندا وڭتۇستىك كورەيانىڭ سپورتشىسى ينچۋل بەك چەمپيون اتانسا، سينگاپۋرلىق تسزەن ۆەي تەونگ مارەگە ەكىنشى كەلىپ، كۇمىس مەداليست بولدى.

بۇل ادىلبەك ءمۋسيننىڭ ازياداداعى ەكىنشى قولا مەدالى. كەشە ول 100 مەترگە باتتەرفلياي ادىسىمەن ءجۇزىپ، ءۇشىنشى ورىندى جەڭىپ العان.

ادىلبەك مۋسين 1999 جىل استانا قالاسىندا تۋعان.  سۋعا جۇزۋدە ەركىن ءجۇزۋ جانە باتتەرفلياي ادىستەرىمەن جۇزەدى. قازاقستان رەسپۋبليكاسىنىڭ رەكوردسمەنى. V يسلام ويىندارىنىڭ چەمپيونى، 2018 جىلعى ازيا ويىندارىنىڭ قولا جۇلدەگەرى.

جاتتىقتىرۋشى —  ستانيسلاۆ وسينسكي.  سپورتشى قازاقستان رەسپۋبليكاسىنىڭ حالىقارالىق دارەجەدەگى سپورت شەبەرى.

داستان كەنجالين،

استانا

فوتو: Gov.kz