• Қазақ
  •   
  • Qazaq
  •   
  • قازاق
  •   
  • Рус
  •   

    قازاقستاننىڭ بەس اتلەتى ازيا چەمپيونى اتاندى

    يراننىڭ استاناسى تەھران قالاسىندا ءوتىپ جاتقان جەڭىل اتلەتيكادان VIII جابىق كەشەندەگى ازيا چەمپيوناتىنىڭ ەكىنشى جارىس كۇنىندە قىزدارىمىز 3 التىن جانە 2 كۇمىس مەدال جەڭىپ الدى. بۇل تۋرالى قازاقستان جەڭىل اتلەتيكا فەدەراتسياسىنىڭ ءباسپاسوز قىزمەتى حابارلادى.

    يران يسلام رەسپۋبليكاسىنىڭ زاڭىنا سايكەس، ايەلدەر ەرلەردەن بولەك جەكە سايىسقا ءتۇسۋى قاجەت. سوندىقتان تاڭەرتەڭنەن تۇسكە دەيىن ايەلدەر، ودان كەيىن ەرلەر اراسىنداعى جارىستار ءوتىپ جاتىر.

    بۇگىن، 2 اقپان كۇنى تاڭەرتەڭگى باعدارلامادا قىزدارىمىز جاتتىقتىرۋشىلار شتابىنىڭ سەنىمىن اقتادى. فينالدا ونەر كورسەتكەن 6 سپورتشىنىڭ بەسەۋى جۇلدەگە ىلىكتى. ونىڭ ىشىندە ۇشەۋى التىن مەدال.

    400 مەترگە جۇگىرگەن سۆەتلانا گولەندوۆا (جامبىل وبلىسى) مەن ەلينا ميحينا (شقو) التىن مەن كۇمىس جۇلدەنى ءوزارا ءبولىستى. 24 جاستاعى گولەندوۆا مارەگە 53.28 سەكۋندتا جەتتى. ەلينا ميحينا ءوز كەزەگىندە 53.49 سەكۋندپەن ەكىنشى بولىپ كەلدى. قولا جۇلدە شري-لانكا سپورتشىسىنا بۇيىردى.

    ال 60 مەترگە توسقاۋىلدار ارقىلى جۇگىرگەن ايگەرىم شىنازبەكوۆا قازاق قىزدارى اراسىنان العاش بولىپ، جەڭىل اتلەتيكادان جابىق كەشەندەگى ازيا چەمپيونى اتاندى. ايگەرىم 60 مەتردى 8.32 سەكۋندتا جۇگىردى.

    ءۇشىنشى التىن جۇلدەگە سىرىقپەن سەكىرۋشى اناستاسيا ەرماكوۆا يە بولدى.17 جاستاعى سپورتشى تەھراندا 3.70 مەترگە سەكىرىپ، سونىڭ ارقاسىندا چەمپيون اتاندى. ەكىنشى ورىنداعى يران سپورتشىسى 20 سانتيمەترگە قالىپ قويدى.

    اناستاسيا بۇعان دەيىن 10 قاڭتاردا وسكەمەندە وتكەن قازاقستان كۋبوگىندا 3.81 مەترگە سەكىرىپ، جاستار اراسىنداعى قازاقستان رەكوردىن جاڭارتقان ەدى.

    تاعى ءبىر كۇمىس 60 مەترگە جۇگىرگەن ۆيكتوريا زيابكيناعا بۇيىردى.الماتىلىق 25 جاستاعى اتلەت فينالدا 7.39 سەكۋندپەن مارەگە ەكىنشى كەلدى. باس جۇلدە قىتاي قىزى ليان سياوچجيعا (7،20) بۇيىردى. ايتپاقشى، قىتاي سپورتشىسى جابىق كەشەندەگى ازيا چەمپيوناتىنىڭ رەكوردىن جاڭارتتى.  ول رەكورد بۇعان دەيىن ۆيكتوريا زيابكيناعا تيەسىلى بولاتىن. ۆيكتوريا 2016  جىلى دوحادا ءدال وسى قاشىقتىقتى 7.27 سەكۋندتا جۇگىرگەن ەدى.

    وكىنىشكە قاراي، ريما كاشافۋتدينوۆا فينالدا جوعارى ناتيجە كورسەتە المادى. قاراعاندى وبلىسىنىڭ اتلەتى 7.50 سەكۋندپەن بەسىنشى ورىندى قاناعات تۇتتى. ريما ەڭ بولماسا كەشەگى ىرىكتەۋ كەزەڭىندەگى ناتيجەسىن قايتالاعاندا قولا جۇلدەگە يە بولار ەدى.

    ايتا كەتەيىك، قازاقستان سپورتشىلارى جابىق كەشەندەگى ازيا چەمپيوناتىنان   ازىرگە 5 التىن، 2 كۇمىس، 1 قولا مەدال جەڭىپ الدى.  جالپى كوماندالىق ەسەپتە ءبىرىنشى ورىندا كەلەمىز.

    پىكىر جازۋ

    Your email address will not be published. Required fields are marked *

    *