SportPress.kz Qazaqstan sport jańalyqtary
Erkin kúresten Qazaqstan qurama komandasynyń jattyqtyrýshysy Qarysbek Mahambetov Bishkekte ótip jatqan Azııa chempıonatynyń alǵashqy jarys kúni týraly óz oıyn aıtty.
Jattyqtyrýshy Olympic.kz-ke suhbatynda balýandardyń kúresine baǵa berip, olardyń aldaǵy múmkindikteri týraly pikir bildirdi.
Ol alǵash ret Azııa chempıonatynda júlde alǵan Meırambek Qartbaı týraly bylaı dedi:
Meırambek Qartbaı alǵash ret Azııa chempıonatynda júldeger boldy. Ol byltyrǵy álem chempıonatynyń jartylaı fınalyna deıin jetip, fınalǵa jeńilgen edi. Bishkekte jartylaı fınaldyq beldesýde jeńýge múmkindigi bar edi. Biraq sońyna deıin jeńisti ustap tura almady. Dese de, Meırambektiń alǵashqy júldesi úshin qýanyshtymyz, — dedi ol.
Rızabek Aıtmuhan týraly onyń áli bolashaǵy bar ekenin atap ótti.
Rızabek Aıtmuhanǵa keler bolsaq, bul balýanymyz 97 kelige beıimdelip kele jatyr. Fınalǵa deıingi qarsylastaryna esh aıla qaldyrǵan joq. Fınalda ol ózi sekildi jas sportshy, álem chempıony Ahmed Tajýdınovpen kúresti. Rızabek adýyndy qarsylasyna jaqsy toıtarys berdi dep oılaımyn. Ahmed burynnan sol salmaqta júrgen jigit. Salmaǵy júz keliden asady. Al Rızabektiń salmaǵy áli de bolsa jetińkiremeıdi. Bul beldesý kezinde báribir de baıqalady.
Elimizden shyqqan tuńǵysh álem chempıony 97 kelide de jaqsy nátıje kórsetedi dep oılaımyn, soǵan senimdimin. Onyń kúresi kóńilge senim uıalatady, — dedi maman.
Ol basqa balýandardyń baby men baǵy kelispegenin jasyrmady.
О́kinishke qaraı, qalǵan úsh salmaqtaǵy balýandarymyz jeńilis tapty. Birine sáttilik, endi birine sheberlik men jyldamdyq jetpeı qaldy. Ásirese, 65 kelidegi sportshylardy áli de daıyndaý ústindemiz. Bul salmaqta uzaq jyldar boıy Dáýlet Nııazbekov kósh bastady. Ol álemdik deńgeıdegi balýandar qatarynan boldy. Endi onyń izbasarlaryn shyǵaramyz, — dedi Qarysbek Mahambetov.
Bishkektegi Azııa chempıonatynyń alǵashqy jarys kúninde Meırambek Qartbaı (57 kg) qola júlde, Rızabek Aıtmuhan (97 kg) kúmis medalıst atandy.
