Ulan-Batyr qalasynda sadaq atýdan jarystyń jalaýy jelbiredi

Mońǵolııa memleketi dástúrli sadaq atýdan I halyqaralyq týrnırdi Ulan-batyr qalasynda uıymdastyrdy. Qyrkúıektiń 5-9 kúnderi aralyǵynda ótken bul jarysta 27 memlekettiń alpysqa jýyq mergenderi baq synady. Bul týraly Qazaqstan ulttyq sport qaýymdastyǵy habarlady.

Mergendik saıysynan Mońǵolııada uıymdastyrylǵan I halyqaralyq týrnır «Azııa stıli», «Koreı stıli», «Eýropa stıli» jáne Mońǵolııa dástúrli sadaq atý stıli boıynsha ótti. Qarshadaı balasynan, qajyrly qarııasyna deıin ulttyq sadaq atýdy ejelden mashyq qylatyn Mońǵolııa eliniń mergenderi  óz astanalarynda  ótken I halyqaralyq týrnırdiń júldeli oryndaryn talassyz ıelengen. Tipti, at ústinen sadaq atýdan álem chempıonatynyń birneshe dúrkin jeńimpazy, majarstandyq áıgili mergen Krıstof Arpattyń ózine bul týrnırde tórtinshi oryndy qanaǵat tutýǵa týra kelipti.

Sýrette: Mońǵolııanyń Ulan-batyr qalasynda ótken I halyqaralyq týrnırge qatysýshy, at ústinen sadaq atýdan halyqaralyq jarystardyń birneshe dúrkin júldegeri, elimizdiń aıtýly mergenderiniń biri Eldos Badashev.

Mońǵolııa memleketi uıymdastyrǵan I halyqaralyq týrnırge qatysýshy 27 memleket qatarynda AQSh, Saýd Arabııasy, Qytaı, Reseı, Germanııa, Kanada, Taıland, Avstralııa, Fınlıandııa sııaqty dástúrli sadaq atý sporty damyǵan elder bar. Bul jarysqa bizdiń elden halyqaralyq jarystardyń júldegeri, jýyrda at ústinen sadaq atýdan Ońtústik Koreıada ótken HV álem chempıonatynda júldeger atanǵan surmergen Eldos Badashev qatysyp qaıtty. Eske salyp óteıik, bıylǵy jyly bizdiń dástúrli sadaq atýshy sportshylarymyz Majarstanda ótken Álem kýbogyna,Ońtústik Koreıada ótken álem chempıonatyna, Túrkııada ótken dúnıejúzilik jarysta baq synady.