«التىن تۇعىر» – ۇلتتىق سپورت ۇزدىكتەرىن ماراپاتتاۋ سالتاناتى وتەدى

ەرتەڭ نۇر-سۇلتان قالاسىنداعى «قازمەديا» ورتالىعىنىڭ كونتسەرت زالىندا ۇلتتىق سپورت قاۋىمداستىعىنىڭ ۇيىمداستىرۋىمەن، «Nur-Otan» پارتياسىنىڭ قولداۋىمەن بيىل جەتىنشى مارتە «التىن تۇعىر-2019» اتتى ۇلتتىق سپورت ۇزدىكتەرىن ماراپاتتاۋ سالتاناتى وتەدى، دەپ حابارلادى ۇلتتىق سپورت قاۋىمداستىعى.

ۇلتتىق سپورت سالاسىنداعى ۇزدىكتەردىڭ مەرەيىن كوتەرۋدى ماقسات تۇتقان بۇل ءداستۇرلى ماراپاتتاۋدىڭ باستالۋىنا ءبىر كۇن عانا قالدى. جەتىنشى مارتە ۇيىمداستىرىلاتىن بيىلعى «التىن تۇعىر» سىيلىعىنىڭ يەگەرلەرى – 2019 جىلعى ۇلتتىق سپورتتىڭ رەسپۋبليكالىق، حالىقارالىق جارىستاردا دارا شىققان جەڭىمپازدار بولماق. اۋدارىسپاق، تەڭگە ءىلۋ، جامبى اتۋدان، كوكپاردان الماتىدا وتكەن جاستار اراسىنداعى ءى ازيا چەمپيوناتىندا، ەلوردا تورىندە وتكەن «التىن جەبە» ءى الەم چەمپيوناتىندا جەڭىمپاز اتانعان، بايگە مەن قۇسبەگىلىك باسەكەلەرىندە توپ جارعان جانە توعىزقۇمالاقتان، اسىق اتۋدان، قازاق كۇرەسىنەن حالىقارالىق جارىستاردا جۇلدەلى ورىن يەلەنگەن كوپتەگەن سپورتشىلار «التىن تۇعىر» سىيلىعىنا لايىق دەپ تانىلادى.

«التىن تۇعىر» سالتاناتىنا مادەنيەت جانە سپورت ءمينيسترى اقتوتى رايىمقۇلوۆا، «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك، ۇلتتىق سپورت قاۋىمداستىعىنىڭ قۇرمەتتى پرەزيدەنتى قايرات ساتىبالدى ۇلى، ءماجىلىس دەپۋتاتى، ۇلتتىق سپورت قاۋىمداستىعىنىڭ پرەزيدەنتى بەكبولات تىلەۋحان جانە باسقا دا ەسىمدەرى ەلىمىزگە كەڭىنەن تانىمال لاۋازىم يەلەرى قاتىسادى دەپ كۇتىلۋدە.

«التىن تۇعىر» – جاستارىمىزدى ەرلىككە، باتىلدىققا، ەپتىلىككە، وجەتتىككە، جۇرەكتىلىككە تاربيەلەيتىن، رۋحىن شىڭدايتىن ۇلتتىق سپورتتىڭ ءداستۇرلى جيىنى. «التىن تۇعىر» – ۇلتتىق سپورت باسەكەلەرىندە ەل نامىسىن اسقاقتاتىپ جۇرگەن ازاماتتارىمىزدىڭ ەسىمىن ارداقتايتىن دۋماندى كەش. «التىن تۇعىردا» ەلىمىزگە تانىمال انشىلەر ساحنا تورىندە ونەر كورسەتەدى.

«التىن تۇعىر-2019» ۇلتتىق سپورت ۇزدىكتەرىن ماراپاتتاۋ 5 جەلتوقسان كۇنى ەلورداداعى «قازمەديا» عيماراتىنىڭ كونتسەرت زالىندا وتكىزىلەدى. باستالۋى ساعات 19-00-دە. كىرۋ تەگىن.